O secretario xeral da Emigración, Antonio Rodríguez Miranda, acompañou esta mañá aos mozos galegos do exterior participantes no programa Conecta con Galicia no Camiño durante a primeira etapa do percorrido que están a realizar por distintas rutas xacobeas.

En Ourense, Miranda estivo acompañado polo delegado territorial da Xunta en Ourense, Manuel Pardo, e compartiu coa mocidade aloxada na Residencia Xuvenil Florentino López Cuevillas os primeiros pasos da Vía da Prata. Os 41 participantes selaron a súa compostela na Oficina de Turismo da Xunta, dando así inicio simbólico a esta experiencia que lles permite reencontrarse coas súas raíces galegas a través do Camiño de Santiago.

Posteriormente, o secretario xeral trasladouse a Chapela para realizar tamén o primeiro tramo do Camiño Portugués con outro grupo de participantes, neste caso aloxados na Residencia Xuvenil Altamar de Vigo. Nesta ocasión, estivo acompañado pola delegada da Xunta en Vigo, Ana Ortiz.

O programa Conecta con Galicia no Camiño, organizado pola Secretaría Xeral da Emigración, en colaboración coa Dirección Xeral de Xuventude, reúne este ano a preto de 100 mozos de entre 18 e 21 anos e de ata seis países distintos de América. O obxectivo da iniciativa é fortalecer os vínculos coa terra de orixe a través dunha experiencia vital, cultural e identitaria como é o Camiño de Santiago.

Durante os vindeiros días, os participantes realizarán un tramo de máis de 100 km a pé, complementando a súa estadía con actividades culturais e de coñecemento da realidade socioeconómica e educativa da Galicia actual.

Con esta edición, a iniciativa acada xa as 36 edicións e suma máis de 3.600 participantes desde a súa posta en marcha, consolidándose como un dos programas de referencia da Xunta para achegar as novas xeracións da diáspora ás súas raíces, así como para fortalecer os lazos que unen a Galicia coa súa colectividade no exterior.