Mensaxe de Antonio Rodríguez Miranda, secretario xeral da Emigración, co gallo do Día Internacional da Persoa Migrante
Quixera neste Día Internacional da Persoa Migrante, e a punto de concluír o 14º ano deste novo século, poñer o foco nas metas que o mundo e os seus e as súas habitantes, todas e todos os humanos, nos fixamos para o futuro próximo.
A migración internacional creceu de xeito notable dende o comezo deste século XXI, e calcúlase que na actualidade máis de 230 millóns de persoas buscan en países distintos ao seu novas oportunidades de mellorar a súa vida e desenvolver os seus coñecementos. En outubro de 2013, os Estados membros da ONU adoptaron por unanimidade unha Declaración na que recoñecen a contribución importante da migración ao desenvolvemento, e chaman a unha cooperación máis ampla para afrontar os retos da migración irregular e facilitar un fluxo de persoas seguro, ordenado e regular. A Declaración tamén resalta a necesidade de respectar os dereitos humanos das e dos emigrantes e de promover as normas internacionais de traballo. Ademais, condena de xeito firme as manifestacións racistas e intolerantes e resalta a necesidade de mellorar a percepción pública sobre as persoas emigrantes e a migración.
Son, dende logo, principios que o Goberno galego e, sen dúbida ningunha, todas e todos os galegos de ben da Galicia territorial e Exterior avalan, secundan, aproban, apoian, e poñen en práctica a diario. Porque un ou unha emigrante é, ante todo, alguén que por múltiples razóns deixou o país no que naceu pero que, salvo contadas excepcións, levará sempre no seu corazón e na súa mente.
Así demóstranmo as colectividades galegas en todas as viaxes que realizo, máis de 40 ao longo deste 2014, nas que poñen de manifesto, en canto teñen ocasión, todo o cariño que gardan á súa Galicia natal, aínda cando leven sen pisala décadas.
É este un bo día, como os 364 restantes do ano, para reflexionar sobre este cariño eterno da Galeguidade cara á súa terra, xenuíno nexo de unión fai que que as galegas e os galegos de todo o mundo nos identifiquemos, nos coñezamos e nos recoñezamos, no máis profundo, como un país avanzado aos demais na plena integración das migracións como un fenómeno consubstancial á Humanidade. O que outrora foi dor convértese hoxe nunha riqueza que dá froitos valiosos para poder gozar dunha Galicia Universal.
Ogallá chegue un día no que todas e todos os humanos sexamos capaces de integrar e integrarnos como o fai a Galeguidade en todo o mundo.
Novas relacionadas