Resultou unha verdadeira festa a celebración do Día de Galicia organizada pola Federación de Asociaciones Gallegas de la República Argentina e as entidades participantes, onde o público que encheu as instalacións do Teatro Bambalinas gozou de varios números musicais de primeiro nivel.

Tras a benvida e as palabras alusivas á data por parte do titular da Federación, Francisco Lores, a Banda de Gaitas "Dúas Beiras" interpretou na apertura da súa presentación o Himno Galego, que rematou cun pechado aplauso de todas e todos os asistentes.

Logo de que a agrupación anfitriona executase varios temas tradicionais, subiu ao escenario o "Conxunto Alborada" da ABC do Partido de Corcubión, que despregou un repertorio no que a música e o baile foron premiados polo cariño do público, que as e os felicitou cun sostido aplauso final.

Tamén espertou a alegría das e dos presentes a recoñecida Agrupación Folclórica Baixo Miño, que sempre cega coa súa posta en escena multitudinaria e colorida.

Na súa quenda, o Grupo Arzuano Mellidense ofreceu numerosas pezas tradicionais galegas que emocionaron a moitas e moitos maiores que estaban nas butacas do Teatro Bambalinas.

O grupo musical "Miña Terra" presentouse en sociedade por primeira vez na entidade, demostrando unhas calidades estupendas á hora de animar un acto tan singular como é a celebración do Día de Galicia.

Así mesmo aconteceu coa agrupación "Mouxos e Coruxas", que impactaron pola súa solidez á hora de interpretar típicas cancións galegas.

Especialmente invitada para culminar a reunión participou a Orquesta Escuela Juvenil de San Telmo, que dirixe a profesora Clara Ackermann, pechando un acto impecable onde o pracer de escoitar boa música resultou o común denominador.

Antes de retirarse, e como xa é tradición por parte da Federación, ao público presente servíuselle a típica queimada galega, acompañada por rosquillas.

Fonte e fotos: Federación de Asociaciones Gallegas de la República Argentina