Feijóo felicita, “nestes dous días para recordar sempre”, ao palista David Cal, medalla de prata nos Xogos Olímpicos de Londres 2012 e mellor olímpico español da historia
Resalta a fortaleza física, a madurez, a humildade e a capacidade de sacrificio do palista galego e felicita “a todos os deportistas galegos, a toda a xente que practica deporte, porque ao final se acredita que a través do esforzo, Galicia pode estar e está no caixón dos grandes atletas do mundo”
O presidente do Goberno galego, Alberto Núñez Feijóo, felicita “nestes dous días para recordar sempre” ao palista David Cal, medalla de prata nos xogos olímpicos de Londres 2012 e mellor olímpico español da historia, con cinco medallas olímpicas.
Logo de que o triatleta galego Javier Gómez Noya acadase, onte, a medalla de prata e da fazaña, esta mañá, de Cal na proba C1 1.000 ms., conseguindo o seu quinto metal olímpico, o responsable autonómico subliña que “certamente, hoxe e onte son dous días que quedan na historia do atletismo galego e español”.
“Tres olimpíadas consecutivas e cinco medallas queren dicir que estamos ante un atleta excepcional. Manter este ritmo de competición e estes resultados desde o ano 2004, cando debutou en Atenas; despois en Pekín 2008 e, agora, en Londres 2012 significa que estamos ante un atleta excepcional e ante o atleta español que máis medallas olímpicas ten, polo tanto, dobre récord incontestable”.
O responsable autonómico resalta a fortaleza física, a madurez, a humildade e a capacidade de sacrificio do palista galego e felicita “a todos os deportistas galegos, a toda a xente que practica deporte, porque ao final se acredita que a través do esforzo, Galicia pode estar e está no caixón dos grandes atletas do mundo”.
Novas relacionadas