Feijóo anuncia o inicio da tramitación da nova Lei de Acción Exterior e Cooperación, que busca mellorar a proxección de Galicia e o máximo aproveitamento das potencialidades que se ofrecen no exterior
Destaca que o Goberno galego continúa a executar as previsións de desenvolvemento lexislativo tramitando unha lei que “se adapta ao novo marco xurídico configurado por dúas leis estatais, a de acción Exterior do Estado e a de Tratados e outros acordos internacionais”.
Sinala que o texto será sometido a exposición pública e será enviado e acordado co Ministerio de Asuntos Exteriores.
É a primeira lei que regula de forma integral a acción exterior e a cooperación internacional para o desenvolvemento.
O presidente do Goberno galego, Alberto Núñez Feijóo, anunciou hoxe o inicio da tramitación da nova Lei de Acción Exterior e Cooperación, unha normativa que busca mellorar a proxección de Galicia no exterior, acadar o máximo aproveitamento das potencialidades que se ofrece no exterior e mellorar a coordinación entre todos os actores involucrados, entre os que se atopan a Xunta, concellos, Universidades e ONGs.
Feijóo destacou que o Goberno galego continúa así a executar as previsións de desenvolvemento lexislativo tramitando unha lei que, dixo, “se adapta ao novo marco xurídico configurado por dúas leis estatais, a de acción Exterior do Estado e a de Tratados e outros acordos internacionais”. E salientou que se fai “dende o máximo respecto ás institucións estatais dentro do noso autogoberno e a nosa autonomía”. Por iso, explicou, “será remitida para o seu análise e acordo do Ministerio de Asuntos Exteriores”
Logo de recordar que o texto deste anteproxecto será sometido a exposición pública, destacou que outras das metas máis concretas desta lei son mellorar a atención dos galegos e as galegas no exterior, consolidar a Eurorrexión e a súa proxección nos países da lusofonía –proponse recoller a posibilidade de realizar intercambios de empregadas e empregados públicos entre Galicia e Portugal-, dotar a Galicia dun maior protagonismo no ámbito da cooperación para o desenvolvemento –regúlase a participación do persoal do Sergas en emerxencias internacionais-, e búscase mellorar e seguir avanzando na participación no exterior e na internacionalización da nosa economía.
No ámbito económico, a nova normativa busca a captación de capital mercantil e industrial destinado a investimento produtivo de Galicia, e incluso tamén á captación de capital humano cualificado.
Ademais, Feijóo explicou que a lei conta con dez títulos nos que se inclúen: a cooperación galega –adaptando a lexislación ás novas circunstancias do sector e abordando a axilización dos procedementos administrativos-, a diáspora –establecendo os principios básicos para favorecer o retorno das e dos emigrantes galegos-, a cooperación con Portugal no ámbito da Eurorrexión, as delegacións e oficinas públicas no exterior, e a nova realidade da mobilidade internacional de profesionais e empresas, cun apartado dedicado integramente a esa nova rede de intereses galegos no exterior.
Do mesmo xeito, entre as novidades tamén se atopa a creación dun Asento de galegos no exterior e dun Asento de empresas galegas no exterior, a creación do Rexistro de foráneas e foráneos con intereses en Galicia -que incluirá voluntariamente a aquelas persoas non españolas e residentes fóra do noso país que teñan especial vínculo coa nosa comunidade-, un apoio decidido á internacionalización das universidades galegas e a posibilidade de “dirixirnos ao Goberno de España cando, en tratados internacionais que estea negociando ou cuestionando, entendamos que afecten a Galicia de forma sobranceira”, sinalou.
Feijóo concluíu aseverando que a lei comeza cun período de información pública “convencido de que imos chegar a un acordo” co Ministerio de Exteriores para que Galicia sexa a comunidade que conte coa primeira lei que regula de forma integral a acción exterior e a cooperación internacional para o desenvolvemento. “Galicia será a primeira comunidade autónoma que aprobe un texto deste tenor, que nos parece que nun Estado complexo como o noso este tipo de lexislacións non sobran, senón que son aclaratorias para seguir construíndo o Estado das Autonomías”, sentenciou.
Novas relacionadas