O pasado sábado 2 de xullo, no Teatro Rosalía de Castro da sede da Hermandad Gallega de Venezuela en Caracas, celebrouse o IIIº Encontro Cultural de Irmandades e Centros Galegos do país organizado pola Dirección de Cultura da Hermandad Gallega na capital venezolana e a Banda de Gaitas Xuntanza Fillos de Ourense, da Asociación Civil Fillos de Ourense.

Neste espectáculo folclórico xuntáronse unha ampla representación das entidades galegas espalladas polo país caribeño: a Agrupación Folclórica Aires da Terra, da Hermandad Gallega de Valencia; a Agrupación Aires Galegos, do Centro Gallego de Lechería - Puerto La Cruz; o Grupo de Danzas Alborada e de Gaitas Cachafeiro, do Centro Gallego de Maracaibo; e os grupos de danzas Semente Nova, Lembranzas, Eiras Nosas e Mestura; de gaitas Celta e pandereteiras Novo Xeito, da Hermandad Gallega de Venezuela en Caracas, así como os anfitrións dese día, a banda de gaitas Xuntanza Fillos de Ourense.

Este encontro proxectou tanto nas e nos participantes como nas persoas asistentes o fortalecemento da verdadeira Irmandade que se dá entre a comunidade galega en Venezuela, un manifesto de amizade e solidariedade entre os nosos centros e irmandades do país.

Fonte e fotos: Hermandad Gallega de Venezuela