O subdirector da Secretaría Xeral da Emigración, Antonio Casas Calviño, asistiu hoxe aos actos na honra ao Emigrante que organiza o Concello de Val do Dubra, onde tivo lugar unha ofrenda floral para lembrar ás veciñas e veciños deste municipio que residen no exterior.

O Concello, que o ano anterior suspendeu esta actividade por mor da pandemia, decidiu celebrala este ano levando a cabo unha misa solemne, ademais da tradicional ofrenda floral ante a Estatua do emigrante. As e os asistentes puideron tamén gozar da actuación de Andrea Pousa na rúa San Lorenzo así como de xogos populares xa pola tarde.

Durante a ofrenda floral, o subdirector da Secretaría Xeral da Emigración destacou que “toda viaxe na procura dun implica afrontar o descoñecido, pero atopámonos nunha época na que ese vertixe é aínda maior pola pandemia” e apelou ao “sentidiño” para que “o próximo ano, coa nosa prudencia e o efecto das vacinas, poidamos estar xa todos de volta e abrazarnos como nos merecemos”. 

Antonio Casas recordou que dende a Xunta de Galicia, e en concreto dende a Secretaría Xeral da Emigración, continúase a reforzar a nosa política de Emigración e apoiar ás e aos nosos galegos do exterior, mantendo un  contacto estreito con tódolos centros e asociacións de galegas e galegos de Europa e América; reforzando as axudas directas ás persoas e ás entidades e ampliando as pontes para o retorno non só das cidadás e cidadáns galegos que marcharon senón tamén das e dos seus descendentes.