O secretario xeral da Emigración, Antonio Rodríguez Miranda, participou na xornada formativa sobre as novas ordes de axudas sociais de carácter económico coas oficinas de atención social das entidades galegas no exterior coas que colabora a Xunta de Galicia en Brasil, Cuba e Venezuela, co obxectivo de ter todo preparado para axilizar as solicitudes das persoas en grave risco social.

Desde 2020, máis de 43.000 familias beneficiáronse desta iniciativa, reforzando así a protección social da colectividade galega no exterior. En 2025 foron máis de 6.000 familias atendidas.

Na xornada tamén participou o persoal técnico das delegacións da Xunta en Arxentina e Uruguai. A dirección técnica da xornada estivo a cargo do subdirectora xeral de Coordinación Administrativa, Económica e de Programas Sociais, Lorena Antelo, acompañada pola xefa de Programas de Servicios Sociais, María Diz. 

O secretario xeral da Emigración recordou que o obxectivo destas reunións “é facilitar información ás oficinas colaboradoras para que poidan facilitar as solicitudes das familias dos galegos residentes nestes países que teñen necesidades realmente urxentes de cara a axudarlles na súa situación”.

O grao de dependencia, a gravidade das enfermidades e os seus tratamentos, os ingresos económicos, e a idade da persoa solicitante, así como as cargas familiares, son os criterios básicos de valoración. Poderán ser beneficiarias destas subvencións as persoas que demostren carecer de rendas, ingresos ou patrimonio suficientes para a subsistencia, e que cumpran os requisitos de necesidade estipulados en cada tipo de axuda.

Este programa vai dirixido a persoas emigrantes galegas e descendentes de primeira xeración.