O secretario xeral da Emigración, Antonio Rodríguez Miranda, presidiu, no Club Español de Buenos Aires, acompañado do delegado da Xunta na Arxentina, Alejandro López Dobarro, o acto de entrega de compostelas e diplomas ás e aos case 80 participantes nos programas Conecta e Reencontros co Xacobeo 2022.

Deste xeito, a Xunta entregou 39 compostelas ás e aos participantes do programa Conecta co Xacobeo que realizaron o pasado outono 100 quilómetros durante unha semana a través dos camiños Portugués e a Vía da Prata. Este programa permitiu que galegas e galegos menores de 65 relacionados con entidades do exterior de diversos países do mundo, entre eles Arxentina, puideran realizar esta peregrinación, converténdose en embaixadoras e embaixadores do Camiño de Santiago, para así animar posteriormente aos cidadáns e cidadás dos seus países de residencia a realizar a peregrinación a Compostela. 

Tamén se entregaron diplomas acreditativos ás e aos 37 participantes no programa Reencontros co Xacobeo do ano pasado, procedentes da Arxentina. Neste caso, trátase de maiores de 65 anos que realizaron pequenos tramos do Camiño coa mesma finalidade que no caso dos Conecta. 

Miranda agradeceu ás e aos participantes o seu interese por coñecer a peregrinación a Compostela e “trasladar a súa beleza e a intensidade desta experiencia entre os galegos residentes en Arxentina e tamén entre a ciudadanía deste país”.