Emigración destina 10.000€ ao Centro Gallego de Mar del Plata para a atención social a galegas e galegos residentes nesta localidade arxentina

Esta axuda ten como obxectivo colaborar no funcionamento do centro de día desta entidade sen ánimo de lucro que asiste anualmente a unha quincena de galegas e galegos. 

Imaxe de arquivo dunha visita do secretario xeral da Emigración ao Centro Gallego de Mar del Plata
Imaxe de arquivo dunha visita do secretario xeral da Emigración ao Centro Gallego de Mar del Plata
Listen to this page using ReadSpeaker
Santiago de Compostela, 3 de xuño de 2022.

A Secretaría Xeral da Emigración destina, a través dun acordo de colaboración, 10.000 euros para o Centro Gallego de Mar del Plata, de cara a axudar na atención social das e dos galegos residentes nesta localidade arxentina. 

Esta entidade sen ánimo de lucro creou en 2004 un centro de día co obxectivo de promover o apoio socioasistencial das persoas maiores a través da súa atención integral con carácter de servizo preventivo e de integración social. 

Na cidade de Mar del Plata reside unha importante colonia de persoas galegas e a súa descendencia, que, a través deste centro, reciben un apoio socioasistencial importante no caso de aquelas e aqueles que teñen máis dificultades económicas. En concreto, nestes intres, están sendo atendidos nesta entidade case unha quincena de galegos e galegas. 

A Secretaría Xeral da Emigración leva anos colaborando con este centro galego na Arxentina, xa que considera necesario contribuír á prestación de apoio á colectividade galega residente neste país e que estean a pasar dificultades vitais.
 

274 lecturas