A Secretaria xeral da Emigración continúa a complementar os mecanismos de atención social ás e aos emigrantes galegos do Uruguai cun novo acordo coa Asociación Primera de Socorros Mutuos de Montevideo, La Española, para facilitar a atención no ámbito sanitario a aquelas persoas en situación de precariedade económica.

Deste xeito, o departamento autonómico apoia, a través dun convenio, con 30.000 euros o programa de atención socio sanitaria  da Asociación Primera de Socorros Mutuos de Montevideo destinado aos galegos e galegas residentes que así o precisen na capital uruguaia.

A Xunta de Galicia continúa a axudar ás e aos galegos do Uruguai en situación de precariedade económica a través de axudas directas como son as económicas individuais e as de emerxencia social, colaborando, ademais, con entidades de asistencia social que atenden a galegas e galegos con dependencia ou de avanzada idade e baixos ingresos económicos, como o Hogar Español. A Administración autonómica complementa, así, as actuacións que tamén está a desenvolver o Estado español neste país americano.

A Asociación Española Primera de Socorros Mutuos é unha entidade sen ánimo de lucro fundada no ano 1853, co obxectivo de crear un fondo común destinado a socorrer aos seus asociados e asociadas no caso de enfermidade, outorgándolles asistencia médica completa. Na actualidade, o número total de persoas asociadas supera as 200.000, das que un número moi relevante son españois e españolas de orixe galega.

Conta cun hospital de 26.500 metros cadrados, dotado con 452 camas, así como con catro sedes secundarias, cinco policlínicas e catro unidades de internación onde se presta asistencia sanitaria á colonia galega residente neste país. 

A entidade ten o compromiso de dar cobertura a todas e todos os seus asociados, moitos deles de orixe galega e  as e os seus descendentes.