A delegada da Xunta no Uruguai, Elvira Domínguez, asistiu ao concerto que ofreceu en Montevideo o grupo galego de folk Luar na Lubre no teatro El Galpón, onde, con grande éxito de público asistente,  presentou o seu último traballo Vieiras e Vieiros. Historias de peregrinos, un álbum que recolle a pegada artística, cultural e etnográfica do Camiño de Santiago.

A xira de Luar na Lubre conta co apoio da Xunta de Galicia. Nos seus 37 anos de existencia, a formación ten vendido xa máis de 350.000 discos e recibiu diferentes premios e recoñecementos dentro e fóra de Galicia. Contou, como artista invitada de excepción, coa presenza de Cristina Fernández, referente da música popular uruguaia que no seu repertorio inclúe numerosas cancións galegas.