A busca de novas oportunidades para os sectores produtivos galegos, a defensa dos intereses de Galicia ante a Unión Europea e a atención á diáspora centraron a axenda exterior das e dos membros do Goberno e das e dos altos cargos da Xunta durante os últimos seis meses.

Así o expuxo hoxe o director xeral de Relacións Exteriores e coa UE, Jesús Gamallo, quen compareceu no Parlamento para dar conta dos obxectivos, a axenda e os resultados das viaxes institucionais realizadas fóra do territorio do Estado.

Axenda do presidente da Xunta
Canto á axenda exterior do presidente da Xunta, Jesús Gamallo subliñou as tres viaxes a Bruxelas para abordar, entre outros, unha solución ao tax lease, e a xestión dos fondos Europeos con criterios de eficiencia.

Ademais de atender ao colectivo de galegos e galegas na illa, a busca de novas oportunidades económicas para Galicia catalizou o obxectivo da recente viaxe do presidente galego a Cuba, sobre todo tendo en conta que o novo marco económico que se abre para o país precisa da colaboración nos eidos agroalimentario, pesqueiro, naval, biotecnolóxico ou das enerxías renovables, entre outros. Por último, lembrou a viaxe de Feijóo a Asís (Italia) como mostra de apoio ao sector turístico e para difundir os actos de conmemoración da peregrinación de San Francisco de Asís a Santiago.

Consellerías
A promoción económica primou tamén a actividade exterior do conselleiro de Economía e Industria, Francisco Conde, sobre todo as dúas viaxes a México (unha delas con extensión a Perú) para ultimar os acordos para o naval galego. Así mesmo, Conde viaxou ao Reino Unido para testar o funcionamento das Plataformas empresariais no exterior de Galicia (Pexga).

Bruxelas tamén foi o destino das viaxes do vicepresidente da Xunta, Alfonso Rueda, e da conselleira do Medio Rural e do Mar, Rosa Quintana, no último semestre do ano. O vicepresidente Rueda viaxou ao centro político da UE para dar conta das reformas administrativas implantadas pola Xunta. Mentres, a conselleira Quintana tivo unha activa axenda tanto en Bruxelas como en Luxemburgo para defender os intereses do sector pesqueiro e da flota galega.

A axenda exterior de cargos públicos da Xunta completouse con viaxes das conselleiras de Facenda e de Sanidade a Bruxelas para atender asuntos relacionados coas súas competencias, e coa viaxe de promoción cultural e institucional do conselleiro de Cultura e Educación a Cardiff.

Doutra banda, o director xeral de Relacións Exteriores e coa UE tamén deu conta no Parlamento galego dos desprazamentos efectuados por el mesmo -en concreto a Mozambique, no marco da cooperación galega no exterior- e por outros directores xerais da Xunta.

E finalmente o secretario xeral da Emigración segue a manter a súa axenda rutinaria de viaxes para atender á colectividade galega no exterior. Neste semestre a súa actividade centrouse en Cuba, Francia, Bélxica, México Uruguai e Arxentina.