Reencontros con Galicia 2023
Obxecto:
Esta resolución ten por obxecto aprobar as bases reguladoras polas que se rexerá a concesión de axudas correspondentes ao programa Reencontros con Galicia para o ano 2023, que ten por finalidade facilitar ás persoas maiores da Galicia exterior, mediante un período de estancia na residencia dependente da Xunta de Galicia en Panxón (Nigrán) e posteriormente coas súas familias, o contacto coa realidade galega e o encontro cos seus familiares, e convocar estas axudas para este ano.
As axudas consistirán no financiamento do custo da viaxe de ida e volta desde os seus países de residencia ata Galicia e da estancia na residencia das persoas emigrantes galegas con escasos recursos económicos.
Persoas participantes:
- Poderán optar a este programa as persoas que cumpran os seguintes requisitos:
a) Ser unha persoa emigrante galega.
b) Ter a nacionalidade española.
c) Residir en América de maneira continuada, como mínimo, durante os dez (10) últimos anos naturais (2013-2023).
d) Ter 65 anos cumpridos na data de finalización do prazo de presentación de solicitudes.
e) Non participar nos últimos cinco (5) anos naturais en programas de viaxes a Galicia organizados pola Secretaría Xeral da Emigración, esto é, desde 2018 en adiante.
f) Valerse por si mesmas e non padecer trastornos psicofísicos que alteren a normal convivencia e estar en condicións de realizar unha viaxe de longa duración, circunstancias que deberán acreditar mediante os correspondentes certificados médicos.
g) Ter uns ingresos persoais inferiores a tres veces o importe das bases de cálculo da prestación por razón de necesidade do Ministerio de Inclusión, Seguridade Social e Migracións do Estado español para o ano 2023, segundo o país de residencia. Se a persoa solicitante convive con outra ou outras persoas nunha mesma unidade económica familiar, a contía anterior virá determinada pola suma do límite máximo de ingresos persoais máis o resultado de multiplicar o 70% da devandita cifra polo número de persoas que convivan menos unha.
h) Contar co consentimento de familiares ata o cuarto grao de consanguinidade ou afinidade para que residan con eles se decidisen prolongar a súa estancia en Galicia.
Lugar e presentación de solicitudes:
FORMULARIOS DE TRAMITACIÓN DAS SOLICITUDES: | picar aquí para acceder á Sede Electrónica |
As solicitudes presentaranse preferiblemente por vía electrónica a través do formulario normalizado EM926G do dispoñible na sede electrónica da Xunta de Galicia, https://sede.xunta.gal, por calquera dos mecanismos de identificación e firma admitidos pola sede electrónica da Xunta de Galicia, incluído o sistema de Chave 365 (https://sede.xunta.gal/chave365), ou a través das seguintes entidades colaboradoras que poderán presentalas por esa vía no seu nome, mediante a oportuna autorización.
- Na Arxentina: Delegación da Xunta de Galicia en Bos Aires.
- No Uruguai: Delegación da Xunta de Galicia en Montevideo.
- No Brasil:
- Peña Gallega de la Casa de España de Río de Xaneiro.
- Sociedad Hispano Brasileira de Socorros Mútuos e Beneficiencia Rosalía de Castro, en Santos.
- Asociación Cultura Caballeros de Santiago en Salvador de Bahía.
- En Cuba: Federación de Sociedades Gallegas na Habana.
- En Venezuela: Hermandad Gallega de Venezuela en Caracas.
- O resto dos países: nos rexistros dos Consulados de España.
Poderán presentar tamén as solicitudes presencialmente na Secretaría Xeral da Emigración (Rúa Basquiños n.º 2 – 15704 Santiago de Compostela) ou no resto de rexistros establecidos na normativa reguladora do procedemento administrativo común.
Número de prazas:
PAÍS | PRAZAS FINANCIADAS 100% |
PRAZAS COPAGO 500€ | TOTAL |
ARXENTINA | 39 | 5 | 44 |
BRASIL | 10 | 5 | 15 |
CUBA | 10 | 0 | 10 |
URUGUAI | 20 | 5 | 25 |
VENEZUELA | 20 | 0 | 20 |
RESTO DE AMÉRICA | 3 | 2 | 5 |
TOTAL | 102 | 17 | 119 |
Documentación para consultar:
Texto completo da convocatoria no DOG (picar aquí para descargar)
Extracto da convocatoria no DOG (picar aquí para descargar)