O Auditorio Vaz Ferreira, en Montevideo, celebra desde este xoves e ata o 31 de outubro o Mes do Camiño. O comisario do Xacobeo 2027, Marcos Gómez Román, xunto co secretario xeral da Emigración, Antonio Rodríguez Miranda, inauguraron esta tarde esta iniciativa de promoción internacional que durante este mes achegará ao público uruguaio diferentes manifestacións da cultura xacobea e permitirá afondar no coñecemento dos Camiños de Santiago.

Durante a súa intervención, Marcos Gómez Román puxo en valor a dimensión universal do Camiño de Santiago, como espazo de encontro entre persoas e culturas e como fenómeno que transcende as fronteiras de Galicia.

Neste senso, salientou a oportunidade que representa o Mes do Camiño para seguir fortalecendo os vínculos entre Galicia e O Uruguai e para dar a coñecer a riqueza cultural, patrimonial e humana dos itinerarios xacobeos, na antesala do Xacobeo 2027. A iniciativa enmárcase nas accións de promoción internacional impulsadas pola Xunta de Galicia para difundir o próximo Ano Santo, ademais do destino Galicia.

O comisario aproveitou tamén a súa presenza en Montevideo para presentar o Xacobeo 2027 e avanzar as principais liñas de traballo que está a desenvolver a Xunta de Galicia para a organización do próximo Ano Santo. A presentación permitiu explicar a dimensión internacional dunha celebración que aspira a reforzar os valores de encontro, convivencia, acollida e intercambio cultural propios do Camiño, así como dar a coñecer a programación e as diferentes iniciativas que se están a artellar para que o Xacobeo 2027 sexa vivido e compartido, tanto pola sociedade galega como polos millóns de persoas que se achegan a Galicia desde todo o mundo.

Mes do Camiño.

O programa inclúe como actividade central a exposición fotográfica Iacobus Gaudet. Os camiños de Santiago en Galicia, integrada por 46 fotografías que permiten percorrer visualmente os diferentes itinerarios xacobeos e descubrir a súa diversidade paisaxística, patrimonial e cultural.

A mostra está acompañada do ciclo de cine Xacobeo, do 10 ao 31 de outubro, con cinco películas relacionadas co fenómeno das peregrinacións, e dun programa de charlas e encontros con persoas expertas do Camiño de Santiago, que permitirán afondar na súa historia, evolución e significado na sociedade actual.

O Mes do Camiño constitúe así unha proposta de divulgación e promoción que busca achegar o fenómeno xacobeo á sociedade uruguaia e, ao mesmo tempo, reforzar os lazos culturais e humanos entre Galicia e O Uruguai. A iniciativa conta coa colaboración da Xunta de Galicia, a través de Turismo de Galicia e da Secretaría Xeral da Emigración, Turespaña, o Instituto Vaz Ferreira e a Asociación Uruguaya de Amigos del Camino de Santiago, e forma parte das actuacións de promoción do Xacobeo 2027 nos mercados internacionais.