O conselleiro de Política Social, José Manuel Rey Varela; o secretario xeral da Emigración, Antonio Rodríguez Miranda; a directora xeral de Xuventude, Voluntariado e Participación, Cecilia Vázquez; o alcalde de Ourense, Jesús Vázquez; a delegada da Xunta, Marisol Díaz; e mailo vicepresidente segundo da Deputación Provincial, Jorge Pumar Tesouro; acompañaron esta mañá durante o primeiro tramo do Camiño de Santiago a un dos grupos de rapaces e rapazas que participan este ano no programa ‘Conecta con Galicia’, que promove a Secretaría Xeral da Emigración en colaboración coa Dirección Xeral de Xuventude, Participación e Voluntariado, da Consellería de Política Social.

O grupo comezou ruta ao pé da Casa do Concello, na Praza Maior ourensá, e foi acompañado polas autoridades ata a Ponte Romana (ou Ponte Vella), a través das principais rúas peonís da cidade. Na saída, o conselleiro de Política Social destacou que “coñecer as nosas raíces, a nosa orixe, o por que do xeito en que facemos as cousas, iso é o que define a nosa base cultural”, e deu ás e aos participantes a benvida a Galicia en nome do seu Goberno.

Pola súa banda, Rodríguez Miranda destacou o feito de que “estes rapaces e rapazas, a través da súa propia vivencia individual, convértense cada ano nos nosos mellores embaixadores ante un público ao que resulta difícil chegar: a mocidade dos países nos que están asentados, e que non ten vinculación directa con Galicia”. Por outra parte, o programa reforza a ligazón das e dos participantes rapaces coa terra dos seus pais, nais e avós e avoas, “algo que é fundamental para manter ese  valor engadido que Galicia posúe: o 70 por cento dos seus cidadáns do Exterior naceron xa na diáspora, son un activo importante que debemos coidar”.

Primeira vez
O alcalde de Ourense, Jesús Vázquez, salientou pola súa parte que esta provincia é unha “das que máis persoas saíron cara á emigración, e o mellor exemplo, neste caso, son eu mesmo: fillo de emigrado a Alemaña. Estou seguro de que a moitos destes rapaces, sobre todo os que tivesen a grande oportunidade de ter escoitado os seus avós, soaralle algunha historia de Ourense”. Amosou asemade a súa satisfacción porque con iniciativas coma esta “revitalízase a Vía da Prata con savia nova, e supón unha oportunidade magnífica para amosar a nosa terra”.

A iniciativa pretende que a mocidade da diáspora, na súa maioría fillas e fillos e netos e netas de galegas e galegos emigrados, teña oportunidade de coñecer de primeira man a realidade galega, e atoparse coas súas familias da outra beira do Atlántico no marco da Campaña de Verán da citada Consellería. O programa ten como obxectivo fortalecer esas ligazóns que relacionan a estes mozas e mozos coa terra das e dos seus familiares e que, en moitas ocasións, senten como propia ao mesmo ou superior nivel dos países onde naceran. Para moitas e moitos deles e delas, supón a primeira posibilidade de coñecer fisicamente a terra dos seus devanceiros, e as xeracións da familia que quedaron na Galicia territorial.

Así, o programa permite este ano que 179 descendentes de cidadás e cidadáns galegos poidan coñecer a realidade da mocidade galega a través da convivencia e das experiencias que lles acheguen as actividades previstas, e sobre todo da convivencia persoal e humana cos seus coetáneos e coetáneas desta parte do océano, pois a estadía realízase conxuntamente cun colectivo de rapaces e rapazas residentes na Galicia territorial.

Actividades de aire libre
‘Conecta con Galicia’ desenvolvese en dúas modalidades. A primeira delas son actividades de aire libre, modalidade da que se beneficiarán 160 mozos e mozas galegos residentes fóra de Galicia, distribuídos en dous grupos de idade, de 14 a 17 anos e de 18 a 20 anos. Compartirán con mozos e mozas residentes en Galicia, en dúas quendas de doce días, do 1 ao 12 de xullo e do 15 ao 26 de xullo, as residencias e albergues xuvenís situados en Galicia e dependentes da Dirección Xeral de Xuventude, Participación e Voluntariado.

Nestas instalacións  realizarán dúas actividades, de seis días cada unha. Durante a primeira, denominada “Cultura e Camiño”, as e os participantes alóxanse na residencia xuvenil Lug II de Lugo, e Florentino López Cuevillas de Ourense, onde participarán en actividades dirixidas a coñecer o patrimonio histórico cultural das respectivas zonas, e percorren o Camiño de Santiago en varias etapas ata o destino final en Compostela: velaí a acción que compartiron hoxe con elas e eles en Ourense as citadas autoridades.

O segundo grupo de actividades, tamén de seis días de duración, desenvólvese baixo o paraugas do epígrafe “O mar de Galicia” no albergue xuvenil de Gandarío en Bergondo (A Coruña) onde realizan actividades de náutica de lecer e de coñecemento do medio mariño.

Campos de traballo
A segunda modalidade son os campos de traballo, da que se benefician 19 mozas e mozos da diáspora, que durante a súa estadía conviven tamén con compañeiros e compañeiras residentes na Comunidade Autónoma. É unha modalidade concibida para participantes con idade comprendidas entre os 20 e 30 anos, na que desenvolven actividades de colaboración desinteresada e voluntaria en traballos diversos na procura dun maior coñecemento da cultura galega, da mellora ambiental da contorna, e da recuperación do patrimonio cultural e arquitectónico.

É precisamente no campo de traballo de Castromaior, en Portomarín (Lugo), onde teñen realizado en anos anteriores -e tamén o farán durante este mes de agosto de 2016- os labores de coñecemento e mellora do patrimonio, neste caso arqueolóxico, nun dos enclaves en recuperación máis interesantes que ofrece a contorna do Camiño Francés.

Con carácter previo á realización da viaxe a Galicia, os mozos e mozas seleccionados, tanto nunha modalidade como na outra, asistiron a sesións informativas nos seus países de orixe, especificamente encamiñadas ao coñecemento da realidade galega en xeral e das actividades a desenvolver no programa en particular. Tamén foron informadas e informados das súas obrigas respecto do cumprimento do réxime interno das residencias ou albergues en que son aloxados. 

Por países
Na edición deste ano 2016, un total de 79 participantes no programa proceden da Arxentina (71 para actividades ao aire libre, e 8 para campos de traballo), 45 do Uruguai (42 e 3), 22 de Venezuela (20 e 2), 16 de Brasil (13 e 3), 8 de Cuba (6 e 2), 8 para actividades de aire libre do resto de América (4 de Perú, 2 de México, 1 de Estados Unidos e 1 de Chile) e 1 para campos de traballo (procedente doutra Comunidade Autónoma española).

Campaña de Verán
Conecta con Galicia enmárcanse dentro da Campaña de Verán 2016 que organiza a Dirección Xeral de Xuventude, Participación e Voluntariado cun orzamento de 2,6 millóns de euros. Esta campaña é a máis inclusiva e importante dos últimos anos no que se refire a número de prazas ofertadas, xa que son en total 9.046, un 6% máis que o ano pasado. 

A campaña de verán inclúe albergues, campamentos, campos de traballo e actividades de ocio e tempo libre para a mocidade. Cómpre destacar que outro dos aspectos positivos da campaña está no impulso ao emprego que leva aparellada. Grazas ao desenvolvemento destas actividades, as empresas de ocio e tempo libre de Galicia dan traballo a máis de 900 persoas monitoras e directoras de campamentos.