O Centro Gallego de Móstoles organizou, o pasado 15 de marzo, un concurso culinario co obxecto de potenciar a cociña caseira, utilizando ingredientes de orixe galega. O único requisito foi utilizar patacas cuxa orixe fose de Galicia. O resto de ingredientes era á libre elección das persoas concursantes, podendo utilizar outros como cebola, pementos, chourizo, etc.

Presentáronse 6 tortillas, confeccionadas todas elas con patacas de orixe galega (de Xinzo, de Lugo, e da Coruña) acompañadas con outros ingredientes. O Xurado, valorando o aspecto, textura, sabor e logo de deliberación, outorgou o premio á tortilla de patacas de Lugo.

Tamén, o sábado 8, a entidade galega do suroeste de Madrid organizou para as súas asociadas e asociados unha visita ao Museo Nacional de Ciencia y Tecnología de España (MUNCYT), situado no madrileño Paseo de las Delicias, que permitiu ás e aos asistentes coñecer, dende outra ollada, as orixes da ciencia e a tecnoloxía dende a Prehistoria ata a Idade Contemporánea.

Así, a través dos obxectos máis habituais nos laboratorios de física e química, pezas antigas sobre astronomía, matemáticas e navegación, a pila eléctrica, as medidas, ordenadores, aparatos musicais, o movemento, as orixes do cine, a fotografía, a hixiene, o tempo, o automóbil, as motocicletas, etc, permitíronlles coñecer a evolución e desenvolvemento das ciencias e as tecnoloxías dende os seus comezos ata os nosos días.