O Secretario Xeral da Emigración, Antonio Rodríguez Miranda, clausurou hoxe a mesa redonda titulada "Que buscan as empresas galegas para contratar talento exterior?", organizada pola Secretaría Xeral da Emigración en colaboración coa Fundación Ronsel.

Durante o evento, que foi retransmitido en directo por Facebook Live a través de GaliciaAberta, púxose de manifesto a importancia de encontros coma este para a xeración de sinerxías. “Espazos coma este son esenciais para xerar redes de contacto que faciliten a integración e o desenvolvemento profesional das persoas retornadas, un paso clave para o seu éxito en Galicia”, destacou Miranda.

Un dos principais beneficios destes encontros é a creación de novas redes de contacto, que permiten ás persoas retornadas conectarse con empresas e profesionais de diferentes sectores. Estas sinerxías son clave para facilitar non só a integración social, senón tamén o desenvolvemento profesional das persoas que regresan a Galicia, moitas veces despois de anos traballando no estranxeiro.

Outro dos aspectos destacados foi o impacto destes eventos na comprensión do mercado laboral galego. O 100% dos participantes afirman que, grazas a mesas redondas como esta, melloraron a súa visión do contexto económico e laboral de Galicia, o que lles permite adaptarse mellor ás oportunidades que ofrece a rexión. Este tipo de foros proporcionan unha plataforma para que os galegos do exterior teñan un coñecemento máis profundo das dinámicas laborais locais, algo crucial para a súa integración profesional.

Por outra banda, os asistentes tamén valoraron a ampla representación sectorial presente no evento. Máis do 87% dos participantes atopan empresas que pertencen aos seus respectivos sectores profesionais, o que confirma que estes encontros cobren unha gran variedade de áreas de interese. Esta diversidade asegura que as persoas retornadas poidan atopar oportunidades en liña coas súas formacións e experiencias, fortalecendo aínda máis o seu potencial de inserción no mercado laboral galego.

Unha das métricas máis impactantes presentadas na mesa redonda foi o feito de que o 67% dos participantes logran concertar entrevistas de traballo grazas ás conexións feitas durante estes encontros. Isto subliña o valor real e práctico destas mesas redondas como porta de acceso ao tecido empresarial galego, facilitando a incorporación de profesionais cualificados ás empresas da comunidade.

A maioría dos galegos que participan nestes eventos contan con formación universitaria e unha experiencia profesional significativa, o que os converte nun recurso valioso para sectores estratéxicos como, distribución, construcción, o tecnolóxico e o da hostalaría, que están en constante demanda de talento. A incorporación deste perfil ao mercado laboral galego non só contribúe a cubrir estas necesidades, senón que tamén achega unha nova perspectiva internacional.

Miranda pechou o evento facendo fincapé en que "Galicia ten o potencial de converterse nun referente en innovación e desenvolvemento grazas ao talento que retorna desde o exterior, enriquecendo o noso tecido económico con novas ideas e enfoques internacionais". Ademais, reafirmou o compromiso da Xunta de seguir traballando para que máis galegos poidan regresar, asegurando que os programas da Estratexia Galicia Retorna continuarán a ofrecer oportunidades reais para o desenvolvemento profesional no seu país de orixe.