O secretario xeral da Emigración, Antonio Rodríguez Miranda, recibiu esta mañá nos aeroportos de Santiago de Compostela e A Coruña aos primeiros grupos de participantes no Reencontros na Casa procedentes da Arxentina, Uruguai e Venezuela. O programa da Secretaría Xeral da Emigración, dirixido a galegas e galegos maiores de 65 anos con poucos recursos económicos, busca promover o contacto destas e destes emigrantes coa súa terra e as súas familias, facilitándolles a oportunidade de redescubrir as súas raíces, e poñéndolles ao tempo en contacto coa realidade actual de Galicia, case sempre nos mesmos lugares nos que naceron. Para algunhas e algúns deles, de feito, é o primeiro retorno á súa terra de nacemento desde que iniciaran a súa andaina alén o Atlántico.

En total, desde a capital bonaerense aterraron 54 persoas beneficiarias desta iniciativa, que tamén permitiu a outras e outros 24 emigrantes, neste caso procedentes de Montevideo, regresar á súa terra de orixe. Miranda, quen estivo acompañado no aeroporto de Lavacolla polo delegado territorial da Xunta de Galicia na Coruña, Ovidio Rodeiro Tato, deu a benvida ás e aos 78 viaxeiros rioplatenses, que se xuntaron ao chegar a Madrid desde os diferentes puntos de saída para tomar o último voo, que os levou ata a capital galega. 

“Poder ser testemuña de como os nosos emigrantes, os nosos maiores, recuperan parte desa emoción, deses vínculos aos que tiveron que renunciar cando marcharon ao outro lado do Atlántico é un dos mellores agasallos que nos dá a historia”, sinalou o secretario xeral da Emigración, quen engadiu que “precisamente por iso, porque eles escribiron a historia, porque eles fixeron de Galicia o que é hoxe, síntome moi agradecido de poder seguir convocando programas que, como os Reencontros na Casa, nos dan a oportunidade de achegalos durante unhas semanas a esta terra que é a súa”. 

Recepción aos venezolanos e venezolanas en Alvedro
A continuación, o titular da Secretaría Xeral da Emigración trasladouse ao aeroporto de Alvedro, onde recibiu ás e os 57 participantes de Venezuela, que chegaron a primeira hora da tarde á Coruña. Tamén alí o responsable autonómico intercambiou impresións cos beneficiarios e beneficiarias do programa da Xunta, a quen ofreceu o seu apoio durante a súa estadía en Galicia e a quen deu a benvida á comunidade da que, en moitos casos, partiron hai décadas e non regresaron ata o de agora.

O resto das 149 persoas beneficiarias están a chegar en voos procedentes dos seus países de residencia, como Cuba e Brasil, en grupos menos numerosos. A media de idade das e dos participantes de Reencontros na Casa ronda nesta nova edición os 78 anos, con lixeiras variacións entre os procedentes dos distintos países de procedencia. Así, mentres as persoas beneficiaras da Arxentina rondan os 76 anos, ao igual ca as de Venezuela, as do Brasil teñen unha media de 77 anos, as do Uruguai 79, e as de Cuba posúen a máis alta, con 81.

Ademais de sufragar unha parte importante do billete, o Goberno galego vela pola súa saúde no traslado e organiza coas familias o reencontro. Unha vez realizado este, son elas, as familias, as encargadas da manutención e hospedaxe dos beneficiarios e beneficiarias da iniciativa. As e os participantes poderán permanecer en Galicia un máximo de 45 días.