As rapazas e os rapaces participantes nos Campamentos de Verán 2011 da Xunta de Galicia procedentes da diáspora, visitaron hoxe Compostela, onde coñeceron a Cidade da Cultura e diversas iniciativas internacionais de dinamización no Centro Coordinador de Información e Documentación Xuvenil, sito na Praza do Matadoiro.

Este verán, serán un total de 300 as mozas e os mozos que se poderán beneficiar das prazas reservadas a fillos, fillas, netos e netas de emigrantes galegos e galegas no exterior nos Campamentos de Verán, que organiza a Dirección Xeral da Xuventude, sufragadas pola Secretaría Xeral da Emigración.

Foron, nesta convocatoria de 2011, máis de 700 as solicitudes recibidas para un total de 336 prazas. Un ano máis, o país do que procede a maioría da mocidade é a República Arxentina, con 148, case a metade do total. Seguen despois Uruguai con 76, Venezuela con 52, Brasil con 20, e o resto dos beneficiarios e beneficiarias proceden de Perú, México, Cuba, Chile, e Costa Rica. Hai tamén tres prazas que se reservaron para residentes noutras Comunidades Autónomas españolas, e finalmente unha delas recaeu nun solicitante residente habitual en Francia.

Trátase dun número de prazas reservado ao colectivo da diáspora, co obxectivo de fornecer as ligazóns que relacionan a estes mozas e mozos coa terra dos seus familiares e que, en moitas ocasións, senten como propia por riba dos países onde teñan nacido. A iniciativa, para moitos deles e delas, supón a primeira posibilidade de coñecer fisicamente a terra dos seus devanceiros, e as xeracións da súa familia que quedaron na Galicia territorial.