A directora xeral de Formación e Cualificación para o Emprego, Zeltia Lado, participou esta tarde no acto de presentación da exposición Emigrantas. Emerxer do silencio, un proxecto do Consello da Cultura Galega apoiado pola Xunta que se poderá visitar no Quiosco Alfonso deica o vindeiro 3 de maio. Alí, destacou a mostra como homenaxe ás mulleres da diáspora, a través de arquivos históricos, instalacións artísticas, fotografías, materiais audiovisuais, cartas, obxectos ou voces gravadas que mostran as diferentes formas de partir, vivir, traballar, resistir e regresar destas mulleres.

Botando man tanto do material documental do Arquivo da Emigración Galega como de novas pezas fotográficas, sonoras, audiovisuais e literarias, Lado salientou que a mostra poña o foco nas experiencias cotiás e colectivas das mulleres emigrantes, arredor do traballo, da aprendizaxe, da organización social, dos coidados, da escrita ou da memoria transmitida. Ao tempo, recoñece o labor das investigadoras, historiadoras e creadoras que fixeron emerxer estas voces.

Dese xeito, segundo sinalou a directora xeral, proponse un diálogo entre arquivos históricos e a creación contemporánea, animando a escoitar, mirar e deter a atención nos distintos relatos co gallo de entender o presente a través do pasado reconstruíndo unha memoria compartida.