A Xunta de Galicia vén de aprobar a decimoquinta edición do programa Xuventude Crea, que este ano se presenta con importantes novidades orientadas a fortalecer a proxección do talento xuvenil en diversos ámbitos artísticos. Unha das novidades máis destacadas é que, por primeira vez, os galegos residentes no exterior poderán participar neste certame, que se consolida como un referente no panorama cultural galego.

A Consellería de Cultura, Lingua e Xuventude reforza nesta edición a transversalidade e a coordinación entre diferentes departamentos do Goberno galego, como a Consellería de Emprego, Comercio e Emigración e a Axencia Galega das Industrias Culturais. Grazas a este enfoque, os galegos residentes fóra poderán non só presentar os seus traballos, senón que, de chegar á final, terán a oportunidade de viaxar a Galicia.

Este ano, o Xuventude Crea 2024 amplía as súas categorías, pasando de 14 a 16. Incorpóranse as modalidades de DJ e creación de contido, atendendo aos novos intereses da mocidade.

A Secretaría Xeral da Emigración financiará o desprazamento dos galegos residentes no exterior que accedan á fase final de certames e competicións de relevancia para Galicia. Ademais, os gañadores poderán acceder a un programa de formación e mentoring a través dos Polos de Emprendemento e Apoio ao Emprego, co fin de desenvolver os seus proxectos artísticos.

O prazo de presentación de solicitudes abrirase este mércores a través da sede electrónica da Xunta e estará dispoñible ata o 10 de outubro. Esta é unha oportunidade única para que a mocidade galega, tanto en Galicia como no exterior, poida amosar o seu talento e contribuír ao enriquecemento cultural da comunidade.