O secretario xeral da Emigración, Antonio Rodríguez Miranda, presidiu esta mañá o acto de entrega de diplomas das “Escolas Abertas” 2019, o programa do Goberno galego que este ano ofreceu a 63 docentes de oito países distintos actualizar e reforzar os seus coñecementos e técnicas pedagóxicas en diferentes disciplinas relacionadas coa cultura galega no exterior. As profesoras e profesores, chegados desde A Arxentina, O Uruguai, O Brasil, Venezuela, Cuba, Chile, México e outras comunidades autónomas de España, recibiron a acreditación de ter asistido ás sesións formativas que impartiron especialistas da Galicia territorial en cada unha das materias durante os últimos quince días na Residencia Docente de Ourense. Gaita tradicional galega, baile tradicional galego, percusión tradicional galega, canto popular e pandeireta, e confección de traxe tradicional galego foron as especialidades demandadas polas propias comunidades galegas que centraron o programa lectivo.