O secretario xeral da Emigración, Antonio Rodríguez Miranda, mantivo hoxe unha reunión cos profesores e profesoras que impartirán clases durante o programa Escolas Abertas que comeza este xoves. As e os docentes, especializados en gaita, percusión, pandeireta, baile e traxe tradicional galego, destacaron a importancia de transmitir e preservar as tradicións culturais galegas entre as novas xeracións de galegas e galegos no exterior. Durante a reunión, o secretario xeral subliñou o compromiso da Xunta de Galicia coa formación continua e a difusión da cultura galega, agradecendo ás profesoras e profesores o seu esforzo e dedicación.

As e os docentes expresaron a súa ilusión por participar neste programa e resaltaron a oportunidade que supón para fortalecer os lazos culturais e sociais entre Galicia e as comunidades galegas de Europa e América. Miranda afirmou que estas iniciativas son esenciais para manter viva a identidade galega no exterior e para fomentar o intercambio cultural.