O secretario xeral da Emigración, Antonio Rodríguez Miranda, compartiu hoxe con medio cento de mozos e mozas pertencentes ao grupo do Estadio Español de Las Condes de Chile, unha visita guiada pola Cidade da Cultura, dentro da viaxe que están a realizar por España e que, nestes días, permitiulles coñecer Santiago de Compostela. Deste xeito, esta visita achégaos á cultura galega, potenciando así os vínculos de moitas e moitos deles, descendentes de galegas e galegos e pertencentes ao Lar Gallego de Chile, entidade vinculada Estadio Español. 

No día de onte tamén puideron coñecer a Catedral de Santiago a través dun percorrido nocturno no que se achegaron tanto á arte e historia do edificio como do Pórtico da Gloria. O Estadio Español de Las Condes de Chile realiza anualmente unha viaxe cultural a España, achegándose así ás diferentes raíces españolas das familias dos rapaces e rapazas que participan na iniciativa.