O secretario xeral da Emigración, Antonio Rodríguez Miranda, recibiu esta mañá no aeroporto de Santiago de Compostela - Rosalía de Castro aos participantes do programa Escolas Abertas.

En total, participarán preto de 50 profesores de entidades galegas do exterior, 41 de América e outras 9 de Europa e resto de España, cunha media de idade de 35 anos.

Este programa, que leva desenvolvéndose varias décadas, está dirixido ás entidades galegas do exterior e permite dar formación especializada ás persoas responsables de impartir docencia en actividades de cultura tradicional galega, de confección de traxes tradicionais galegos ou baile.

Escolas Abertas permite, deste xeito, espallar a cultura, as tradicións e a idiosincrasia galega por todo o mundo, a través da convivencia e da estadía de profesores que imparten clases en diferentes entidades galegas do mundo, que transmitirán a súa experiencia propia a moitos outros nos seus lugares de orixe ou residencia habitual, mediante o efecto multiplicador dos cursos formativos.

Os alumnos deste programa son así, á súa vez, formadores nos lugares dos que proceden, polo que os seus coñecementos, e tamén a súa experiencia de contacto directo coa realidade actual do país, chega deste xeito aos cidadáns da Galicia do exterior. Coa instrución e mellora de habilidades dos docentes participantes na iniciativa, acrecéntase o interese e a formación de milleiros de galegas e galegos residentes, e mesmo nados fóra da Galicia territorial.

Trátanse de cursos presenciais que pretenden garantir a participación da cidadanía galega no exterior, tanto na vida social como na vida cultural de Galicia, de cara a dinamizar as comunidades galegas de Europa e América. Durante unha semana, os participantes recibirán tamén a visita de recoñecidos músicos galegos de prestixio.

Estas xornadas celebraranse do 8 ao 20 de xullo no Centro Superior de Hostalaría de Galicia, en Santiago de Compostela.