O secretario xeral da Emigración, Antonio Rodríguez Miranda, acompañado do alcalde de Ferrol, José Manuel Rey Varela, e a delegada da Xunta en Ferrol, Martina Aneiros Barros, presidiron a gala coa que se puxo o peche de ouro ao programa Escolas Abertas da Xunta de Galicia que tivo como obxectivo que medio cento de galegas e galegos do exterior, membros das entidades galegas de dez países de Europa e América, se formaran no Superior de Hostalaría de Galicia, en Santiago de Compostela, ao longo destas pasadas semanas.

Centos de persoas puideron desfrutar cos bailes, cantos, desfiles e músicas preparadas por estas e estes profesores de centros galegos do exterior e que demostran que a cultura galega promóvese en todo o mundo e transmítese de xeración en xeración. Deste xeito, as e os participantes no programa Escolas Abertas actuaron na praza do Marqués de Amboage ofrecendo diversas interpretacións musicais e de danza, así como tamén un desfile cos traxes tradicionais que confeccionaron estes días. A gala rematou co espectáculo de gaitas e luz Mitic.

Este programa, que leva desenvolvéndose varias décadas, está dirixido ás entidades galegas do exterior, e permite dar formación especializada ás persoas responsables de impartir docencia en actividades de cultura tradicional galega, de confección de traxes tradicionais galegos e de cociña galega.

O secretario xeral da Emigración agradeceu o labor das e dos formadores destes alumnos e alumnas e instou ás e aos participantes a seguir a traballar por Galicia dende o exterior “e a facer crecer a nosa cultura por todo o mundo”.

Trátase de cursos presenciais que pretenden garantir a participación da cidadanía galega no exterior, tanto na vida social como na vida cultural de Galicia, de cara a dinamizar as comunidades galegas de Europa e América. Durante unha semana, as e os participantes recibiron tamén a visita de recoñecidas e recoñecidos músicos, cociñeiros, artesáns e bailaríns de prestixio galegos.