O Padroado da Fundación Galicia Saúde vén de decidir dar comezo ao proceso de extinción, nunha decisión avalada polos seus membros, e que dá resposta a unha vella aspiración do Centro Gallego de Buenos Aires (CGBA).

A Xunta seguirá dando pulo ás actividades e iniciativas que leve a cabo o propio Centro, o seu hospital, e o resto de entidades galegas na Arxentina, e en todo o mundo. Ábrese daquela un período, que a Xunta agarda sexa frutífero, para redefinir os obxectivos e sistemas de funcionamento do hospital, sempre coa máxima do mantemento das prestacións asistenciais aos beneficiarios. A intención é que a extinción da Fundación reverta exclusivamente no beneficio dos emigrantes galegos en Bos Aires e en toda Arxentina.

No Padroado da Fundación Galicia Saúde están presentes os conselleiros de Facenda, e de Presidencia, Administracións Públicas e Xustiza; os secretarios xerais de Emigración, e da Consellería de Sanidade; o presidente do Centro Gallego de Buenos Aires; e representantes das catro agrupacións que conforman o CGBA.

A difícil situación económica do hospital do CGBA produciuse pola xestión levada a cabo durante o bipartito en Galicia, tanto na súa política de persoal coma no progresivo endebedamento desta institución.

As actuacións dos anteriores xestores na súa xestión produciron un progresivo endebedamento, e impediron a necesaria adopción das medidas correctoras que neste momento están tomando, de maneira coordinada, a Xunta de Galicia e o propio CGBA.

A iniciativa da extinción da Fundación Galicia Saúde ten o respaldo dunha entidade social, referente da Emigración galega, como é o CGBA. O actual Goberno galego vai apoiar a iniciativa do Centro de asumir de forma autónoma a xestión integral do hospital dependente do mesmo, sempre mantendo o compromiso de apoio a esta centenaria institución.

Papel do Goberno de España
Tanto o Padroado da Fundación como a Xunta de Galicia esperan que o Goberno de España apoie, de forma clara e responsable, o sistema hospitalario dos españois no exterior.

A Xunta entende que o mantemento do sistema hospitalario dos españois no exterior ten que converterse nunha das máximas prioridades do Goberno do Estado, e que de forma coordinada coas administracións autonómicas, debe xerarse un Plan Estratéxico a medio e longo prazo que dea solución de continuidade a unha das maiores e mellores obras da Emigración galega, e española, na súa historia.