O xoves 17 de xaneiro ás 18:30 h, no Museo Centro Gaiás de Santiago de Compostela, dentro das actividades arredor da exposición Castelao maxistral. A boa obra ao mestre honra, a Fundación Cidade da Cultura de Galicia, coa colaboración de Amnistía Internacional, organiza o encontro Exilio e refuxio. Dúas situacións na nosa sociedade contemporánea.

• A Guerra Civil en España obrigou ao exilio o artista e intelectual galeguista Daniel Rodríguez Castelao. A súa obra icónica A derradeira leición do mestre —enmarcada nesa época escura de represión fascista— é a peza protagonista da exposición que acolle o Museo Centro Gaiás, Castelao maxistral. A boa obra ao mestre honra. Por iso,  o programa de actividades ao redor desta mostra —que está a ser visitada xa por máis de 20.000 persoas— obrigaba a celebrar un encontro con persoas que na actualidade —en condición de refuxiadas ou exiliadas— están a pasar unha situación similar á que viviu Castelao e moitas e moitos dos seus coetáneos.
• Na nosa sociedade actual, a nivel global, estase a vivir unha complicada situación xeopolítica que se reflicte no número de  vítimas de conflitos bélicos e políticos, especialmente visibles a través do número de persoas refuxiadas, exiliadas e/ou represaliadas.
• Para darlle visibilidade a esta situación, e grazas á colaboración con Amnistía Internacional, a Cidade da Cultura incorpora nas súas actividades ao redor da exposición Castelao maxistral. A boa obra ao mestre honra este encontro con persoas refuxiadas e exiliadas que, neste intre, viven en Galicia.
• O obxecto é que compartan a súa crúa experiencia, na que dean a coñecer a realidade dos seus países e zonas de orixe en conflito, á vez que procurar eses paralelismos co contexto sociopolítico de Castelao, pero sobre todo escoitar e empatizar coas súas inquedanzas e coas súas necesidades.
• A mesa será moderada polo responsable de Relacións Institucionais de Amnistía Internacional de Vigo, Manuel Martínez Barreiro, e formarán parte da mesa:
  -Juan Sosa Maldonado, persoa refuxiada proveniente de Oaxaca (México).
  -Nour Al Hussen, persoa exiliada proveniente de Siria.

Entradas: De balde, previa inscrición

Máis info: www.cidadedacultura.gal | Facebook | Twitter | Instagram