Obxecto deste programa e supostos de axuda:

O programa de Emerxencia Social do 2025 convócase co fin de outorgar unha prestación económica única a persoas emigrantes galegas e aos seus fillos que se atopen nunha situación de emerxencia derivada dalgunha circunstancia extraordinaria sobrevinda no último ano.

En concreto, a axuda diríxese a cubrir gastos específicos para aliviar carencias graves referidas a:

• Art. 1.1): as condicións básicas de subsistencia do solicitante ou a súa unidade familiar (alimentación, coidados persoais esenciais, educación…)
• Art. 1.2): as condicións da súa vivenda (deterioración grave, falta de equipamento ou dotacións esenciais)
• Art. 1.3): as condicións de saúde ou a atención asistencial (intervencións, medicación, coidadores, etc...)

Estas axudas son incompatibles con outras axudas públicas para os mesmos conceptos.

Destinatarios:

Emigrantes galegos e os seus fillos/as con nacionalidade española que teñan poucos recursos e residan actualmente nalgún dos países de América para os cales o Estado español fixara a base de cálculo para a prestación por razón de necesidade.

Requisitos xerais:

1. Os non nados en Galicia: figurar rexistrado/a en o PERE e vinculado/a con algún concello galego polo menos tres meses antes da presentación da solicitude.
2. Carecer de rendas ou ingresos suficientes e acreditalo conforme ao disposto no art. 8.
3. Carecer de patrimonio inmoble suficiente e acreditalo conforme ao disposto no art.8.
4. Acreditar documentalmente a situación de emerxencia social que xustifique a solicitude de axuda, segundo o indicado no art. 8, 1.4).
5. Cumprir os requisitos establecidos na lexislación de subvencións para poder obter axudas públicas (cfr: Declaración da persoa solicitante ou representante do Anexo I).
6. En caso de solicitude de axuda para cubrir gastos de adecuación da vivenda habitual (art. 1.2) ou de carácter sanitario ou asistencia (art.1.3): presentar xustificación de gastos realizados e pagos segundo Anexo IV.

Prazo para a presentación das solicitudes e documentación complementaria:

Desde o 7 de marzo ao 6 de outubro da 2025.

Forma e lugar de presentación das solicitudes:

As solicitudes presentaranse preferiblemente por vía electrónica, mediante o formulario normalizado, anexo I, dispoñible na sede electrónica da Xunta de Galicia, (dispoñible en https://sede.xunta.gal e http://emigracion.xunta.gal) e por calquera dos mecanismos de identificación e firma admitidos pola sede electrónica da Xunta de Galicia, incluído o sistema de Chave365 (https://sede.xunta.gal/chave365), ou a través das seguintes entidades colaboradoras, que poderán presentalas por esa vía, no seu nome, mediante a oportuna autorización:

• En Arxentina: Delegación da Xunta de Galicia en Bos Aires
• En Uruguai: Delegación dea Xunta de Galicia en Montevideo
• En Brasil:
  • Peña Gallega de la Casa de España de Río de Janeiro
  • Sociedade Hispano Brasileira de Socorros Mútuos e Instrução, en São Paulo
  • Sociedade de Socorros Mútuos e Beneficente Rosalía de Castro, en Santos
  • Asociación Cultural Caballeros de Santiago, en Salvador de Bahía
• En Cuba: Federación de Sociedades Galegas na Habana
• En Venezuela: Hermandad Gallega de Venezuela en Caracas

Opcionalmente, poderanse presentar as solicitudes presencialmente nos Consulados de España ou en calquera dos lugares e rexistros establecidos na normativa reguladora do procedemento administrativo común.

• Texto íntegro da convocatoria no D.O.G.: (picar aquí para descargar)
• Extracto da convocatoria no D.O.G. : (picar aquí para descargar)