O presidente da Xunta, Alfonso Rueda, agradeceu a oportunidade que está a ter durante a súa estancia para estreitar vínculos, tanto a nivel cultural como empresarial, e coñecer mellor as necesidades de todos os emigrantes galegos que viven no Uruguai.

Fíxoo durante a reunión que mantivo con entidades galegas neste país, na Sede Deportiva Centro Gallego de Carrasco, na que estivo acompañado polo conselleiro de Emprego, Comercio e Emigración, José González. Durante o encontro, Rueda salientou o labor destas entidades e o seu esforzo por constituír “unha das comunidades galegas máis importantes” a nivel global, destacándoas, ademais, como as mellores embaixadoras de Galicia neste territorio.

Así mesmo, o presidente galego reiterou o compromiso do seu Executivo por que todas as persoas que queiran volver a Galicia poidan facelo e se sintan acollidas. Neste sentido, recordou a importante ferramenta que supón a Estratexia Galicia Retorna, a través da cal se ofrecen os medios para que os emigrantes que o desexen poidan volver á súa terra de orixe.

Rueda ofreceu o apoio da Xunta para que as comunidades galegas en todos os países do mundo se sintan acompañadas e para que cada día haxa unha relación máis estreita e forte cos galegos do exterior.

A nivel empresarial, o presidente da Xunta destacou a importante presenza de empresas galegas asentadas no Uruguai “que están creando riqueza aquí desde fai moito tempo” e que poden contribuír non só para aumentar as exportacións de produtos galegos cara estas latitudes senón tamén “como porta de entrada de todos os produtos que queira trasladar Uruguai cara Europa”.