“Graduados e graduadas da promoción 2015 do Colexio Castelao: vós sodes o novo rostro de Venezuela, de España e de Galicia. Mellorádeas mediante o diálogo e a tolerancia, desde o rigor e a autoesixencia. Non para encerrarvos nela, senón para que desde a conciencia global, como dicía o poeta, «sexan tódolos pobos e tódolos hortos nosos». Empeñádevos en poder transmitir un día unha herdanza mellor que a que recibides”. Con estas palabras dirixíase o secretario xeral da Emigración, Antonio Rodríguez Miranda, ás e aos integrantes da promoción de alumnos do Colexio Castelao que este ano concluíron os seus estudos no centro.

Miranda, canda á profesora Janeth Mejías, aceptou ser padriño desta vixésimo quinta promoción de graduadas e graduados (o correspondente ao nivel previo á Universidade), no ano en que asemade o Colexio Castelao cumpre 50 anos. Trátase dunha das dúas institucións educativas en activo creadas por e para a diáspora galega, esta nun país no que arestora residen, segundo o INE, 46.882 galegas e galegos, dos que xa dous terzos (o 64’6 %) naceron na diáspora.

O titular de Emigración da Xunta tivo un recordo ao final da súa alocución ao galego universal que dá nome ao Colexio, lembrando unha das súas citas: “O verdadeiro heroísmo está en transformar os desexos en realidades e as ideas en feitos”. Nese senso, animou ás rapazas e aos rapaces presentes a involucrarse no desenvolvemento dunha sociedade mellor.

Esta mellora ha pasar por gañar espazos de liberdade para todas e todos; neste senso, Miranda dirixiuse tamén ás e aos docentes para lembrarlles que “poucos empeños tan nobres pode emprender un ser humano, poucos proxectos tan útiles pode haber para a sociedade, como educar en liberdade e para a liberdade”.

Puerto La Cruz
Miranda continúa a súa viaxe por Venezuela, para pulsar directamente a actualidade da diáspora galega no país, en Puerto La Cruz, onde visita ás e aos socios, e as instalacións, do Centro Galego desta localidade, para reunirse despois coa súa directiva. Xa na xornada do sábado, manterá un encontro coas socias e socios, e despois especificamente con mozas e mozos, da entidade. Finalmente, Miranda concluirá esta nova andaina achegándose a coñecer ás e aos socios, e as instalacións, dunha entidade senlleira na localidade costeira de Carballeda, preto de Maiquetía, o Club Tanaguarena, do que a maioría de persoas asociadas son galegas.

Con esta nova viaxe, o secretario xeral da Emigración cumpre o compromiso de manter periódico contacto directo coas comunidades galegas residentes nesa República, nestes tempos en que –igual que o resto da cidadanía- as e os paisanos residentes alí están a atravesar momentos de dificultade económica.