O mércores 7 de maio ás 19,30 h., na Casa de Galicia en Madrid - Delegación da Xunta de Galicia en Madrid, inaugurarase a exposición Club raza Can de Palleiro. Raza autóctona galega.

• Poderá visitarse ata o 30 de maio, en horario de 10,00 a 14,00 h e de 16,00 a 20,00 h. Festivos: de 10,00 a 14,00 h.
• Con esta mostra fotográfica, o Club pretende dar a coñecer as características da Raza Can de Palleiro, un pastor galego en perigo de extinción. O Club Can de Palleiro desenvolve o seu labor de recuperación desta raza autóctona desde o ano 2002
• A orixe do Can de Palleiro está nas rexións de Centro Europa, que coas migracións se asentou no norte e noroeste de España. Tratábase dun can sufrido e traballador, incansable, que se empregaba para levar as vacas no prado e impedir que se escaparan, acompañaba a anciáns/ás e nenos/as nas casas e avisaba da presenza de estraños/as. O nome "can de palleiro" vén do feito de que en épocas de escasez era un can considerado animal de segunda, que sobrevivía comendo o que atopaba e durmindo no palleiro
• Na actualidade existen algo máis de 600 exemplares rexistrados por toda Galicia, e algún fóra de Galicia como en Noruega, México, Brasil, Castela-León, País Vasco e Cataluña