A Praza de Santa María de Lugo converteuse este pasado luns nun escaparate da cultura tradicional galega coa celebración da Gala de Clausura de Escolas Abertas 2026, un acto aberto á cidadanía no que os participantes desta edición compartiron co público o traballo desenvolvido ao longo das dúas últimas semanas. O secretario xeral da Emigración, Antonio Rodríguez Miranda, participou no evento xunto á alcaldesa de Lugo, Elena Candia, e destacou que "a cultura galega segue máis viva ca nunca grazas ás persoas que, desde os centros galegos do exterior, a ensinan e a transmiten ás novas xeracións".

Durante a gala, os 50 alumnos procedentes de Arxentina, Uruguai, Venezuela, Brasil, México, Cuba, Chile, Alemaña, Estados Unidos e España ofreceron diversas actuacións nas que amosaron os coñecementos adquiridos nas especialidades de baile tradicional galego, canto popular e pandeireta, gaita tradicional, percusión e formación para persoal directivo, culminando cunha actuación conxunta que simbolizou o espírito de unión do programa.

Miranda puxo en valor o compromiso das entidades galegas do exterior e lembrou que Escolas Abertas cumpre este ano a súa 35ª edición, consolidándose como un dos programas máis representativos da Secretaría Xeral da Emigración para garantir a continuidade da cultura galega no mundo. "Cada unha das persoas que hoxe sobe a este escenario converterase mañá nun multiplicador da nosa identidade, levando o aprendido a milleiros de alumnos nos seus respectivos centros galegos", sinalou.

O secretario xeral tamén destacou que a evolución do programa permitiu incorporar nesta edición formación específica para persoal directivo das entidades galegas, reforzando así non só a transmisión da cultura, senón tamén a capacidade organizativa e o futuro do movemento asociativo galego no exterior. Nesta liña, reiterou que a Xunta continuará impulsando iniciativas como Escolas Abertas dentro da súa política de apoio permanente á colectividade galega e de fortalecemento dos vínculos coa Galicia exterior.

A gala concluíu coa actuación especial de Carlos Núñez, que puxo o broche de ouro a unha noite na que música, baile e tradición volveron demostrar que Galicia continúa presente e viva moito máis alá das súas fronteiras.