O presidente da Xunta, Alberto Núñez Feijóo, reivindicou hoxe o papel das e dos emigrantes galegos na transformación social, económica e cultural da Comunidade. “Na emigración non soamente naceron os símbolos que nos identifican, tamén naceu o espírito dunha Galicia gañadora capaz de transformar soños en realidades”, aseverou.

Durante os actos de celebracións do Día de Galicia no Centro Galego de Londres na capital británica, Feijóo destacou a necesidade de lembrar sempre de onde vimos “e cal foi o punto de partida da Galicia de hoxe”, dixo, en alusión aos homes e mulleres da diáspora que souberon integrarse na sociedade anfitrioa sen renunciar á súa galeguidade.

O responsable do Goberno autonómico referiuse tamén ás mozas e mozos galegos que hoxe están a desenvolver as súas profesións e o seu espírito emprendedor nunha das maiores cidades de Europa como é Londres.

Nesta liña, e co obxectivo de que esa experiencia adquirida nunha das metrópoles máis importantes do mundo redunde en beneficio de Galicia, Feijóo destacou o traballo e compromiso do Goberno galego a través de iniciativas postas en marcha pola Secretaría Xeral de Emigración, a Consellería de Economía e a Consellería de Traballo e Benestar, dirixidas ao retorno emprendedor.