Aproveitando a visibilidade que outorgou a Galicia a súa condición de comunidade convidada de honra pola Embaixada de España na Arxentina con motivo da celebración do Día da Hispanidade (12 de outubro), a Xunta de Galicia levou a Bos Aires a súa iniciativa Saborea Galicia Calidade.

No marco deste programa, proposta pioneira de difusión no exterior do bo facer da cociña galega, incluíronse os concertos dos artistas galegos Baiuca e Luz Casal, así como dous pases de cata dirixidos polo chef Manolo Costiña, do restaurante Retiro da Costiña (Santa Comba, A Coruña). Nas actividades realizadas na capital arxentina, participaron o presidente da Xunta, Alfonso Rueda; o conselleiro de Emprego, Comercio e Emigración, José González; o secretario xeral da Emigración, Antonio Rodríguez Miranda; e o delegado da Xunta na Arxentina, Alejandro López Dobarro.