As galegas e os galegos que saíron cara ao exterior en busca de novos proxectos e agora regresan á súa terra teñen unha gran oportunidade para desenvolver na comunidade o talento adquirido ou perfeccionado fóra. Isto é posible grazas ás subvencións postas en marcha pola Secretaría Xeral da Emigración, cun orzamento global de 100.000 euros e cun tope de 8.000 euros por persoa beneficiaria en caso de ser muller, menor de 39 anos, e membro dunha sociedade laboral ou cooperativa.

Un impulso, que ademais é compatible e complementario coas axudas establecidas -para todas as fases do emprendemento- para a poboación galega polo Instituto Galego de Promoción Económica (Igape), dependente da Consellería de Economía, Emprego e Industria, e tamén as da antiga Consellería de Traballo.

Este último departamento autonómico presenta cada ano as liñas de financiamento para a xeración de novas empresas, para persoas autónomas, emprendedoras e cooperativas, por valor superior aos 27 millóns de euros, cos que apoia o establecemento como traballadora ou traballador autónomo ou por conta propia, e as iniciativas emprendedoras e de emprego.

Con estas liñas de subvencións ao emprendedor, a Xunta materializa o seu compromiso de apoiar a creación de novas empresas radicadas en Galicia e loitar contra o desemprego. No caso concreto da resolución de Emigración, preténdese que a pèrsona retornada aproveite a bagaxe, coñecementos e experiencias persoais e profesionais adquiridas no exterior en beneficio de toda a comunidade, cre novos postos de traballo á vez que consolida a súa volta, e ata contemple Galicia como destino para investir o seu patrimonio.

Esta resolución persegue que a ou o retornado poida beneficiarse desta liña específica de axudas para o seu proxecto de autoemprego ou empresarial, e tamén que lle sirva de reclamo para coñecer as establecidas polas distintas Consellerías competentes para a poboación xeral.

Deste xeito, incentivarase que os proxectos que teñan en mente as persoas que volven á comunidade tomen forma canto antes, e axuden á recuperación do tecido económico na Galicia territorial, a través de iniciativas nadas dentro e tamén fóra do territorio, especialmente aquelas xeradas a raíz das experiencias profesionais no exterior. Así mesmo conséguese engadir viabilidade aos proxectos do galego ou galega residente ata agora fóra da súa terra.

A iniciativa da Secretaría Xeral da Emigración subvenciona os gastos que leva consigo o establecemento das e dos emigrantes retornados ben como traballadoras e traballadores autónomos ou por conta propia, ben como socias e socios traballadores de sociedades laborais ou cooperativas de traballo asociado. Así, son obxecto de subvención ata o 80% dos gastos de notaría e rexistro, taxas, licenzas administrativas, servizos profesionais externos, gastos derivados do desenvolvemento e implantación da páxina web e da pasarela de pago para a realización de vendas en liña, publicidade e propaganda, primas de seguros, arrendamento de local, de maquinaria e de equipos informáticos, e fornezo de servizos imputables ao desenvolvemento da actividade (tales como calefacción, auga, electricidade, telefonía e internet).

A contía tope da axuda é de 4.000 euros para autónomas e autónomos e 6.000 para sociedades laborais ou cooperativas, en ambos casos con 1.000 euros a maiores si a persoa solicitante ten 39 anos ou menos, e outros 1.000 se é muller.

Fonte: El Correo Gallego