O luns 11 maio ás 20,00 h., na sala Babylon da capital alemá, dentro do ciclo de actividades das Semanas da Cultura Galega que organizan o Lectorado de Galego da Freie Universität Berlin e o Instituto Cervantes de Berlín, proxectarase o documental Brasil somos nós, do director Robert Bellsolà.

No filme, o gaiteiro vigués Carlos Núñez narra a viaxe que emprendeu na procura do seu bisavó, José María Núñez, que emigrou ao país latinoamericano a comezos do século XX e desapareceu, supostamente asasinado por outro músico. O documental amosa a influencia que a música do país brasileiro exerce sobre Carlos Núñez, que se deixa absorber por un país no que o ritmo reina en todos os aspectos da vida e que aínda conserva a vella cultura galego-portuguesa enriquecida polo contacto con outras tradicións, especialmente de África.

• Prezo da entrada: 7€ (para o alumnado do Instituto Cervantes e do Lectorado de galego da FU 4€)