O xoves 8 de maio ás 19,30 h., na Casa de Galicia en Madrid - Delegación da Xunta de Galicia en Madrid, inaugurarase a exposición 51 Páxinas das Nosas Letras, unha iniciativa do Parlamento de Galicia en colaboración coa Xunta de Galicia e a Real Academia Galega, que naceu para render homenaxe ás autoras e autores aos que se lle dedicou o Día das Letras Galegas desde a súa institución en 1963.

Ao cumprirse o 50 Aniversario da instauración por parte da Real Academia Galega, do Día das Letras Galegas, o Parlamento de Galicia patrocina e organiza unha exposición itinerante conmemorativa desta efeméride. A exposición consta de 51 medallas en baixo relevo das caricaturas das e dos persoeiros aos que lle foi dedicado o Día das Letras Galegas. Poderá visitarse ata o 28 de maio, en horario de 10,00 a 14,00 h. e de 16,00 a 20,00 h.  e os festivos de 10,00 a 14,00 h.

A mostra dedica un panel a cada un dos autores e autoras e está integrada polas Medallas das Letras Galegas pertencentes á colección de arte do Parlamento e que son obra do debuxante, pintor e caricaturista Siro López e do escultor Manuel Ferreiro Badía. Reproducen a faciana das homenaxeadas e dos homenaxeados no Día das Letras Galegas.

Complétase a exposición con paneis que dan conta das biografías e as principais obras das autoras e autores que foron elaborados por diferentes académicos da Real Academia Galega, na busca dun achegamento ao universo literario de Galicia.