O mércores 4 de marzo ás 19,00 h., na Casa de Galicia en Madrid - Delegación da Xunta de Galicia en Madrid, inaugúrase a mostra Manuel Rodríguez López. Emigrante galego. Poeta obreiro, producida por GaliciaDigital, que estará exposta ata o 11 de marzo, e composta de varios paneis que recollen diversos aspectos da vida e obra do escritor de Paradela, que escribiu a maior parte da súa obra en Cataluña e está considerado o poeta obreiro do século XX en Galicia.

• Horario: de 10,00 a 14,00 e de 16,00 a 20,00 h. Festivos: de 10,00 a 14,00 h.

• A exposición forma parte do proxecto Manuel Rodríguez López que GaliciaDigital e a familia do escritor emprenderon en 2012 con apoio institucional dos Concellos de Paradela e Lugo, a Deputación de Lugo e a Secretaría Xeral de Política Lingüística

• Manuel Rodríguez López foi un emigrante galego que con tan só seis anos emigrou a Barcelona onde viviu a maior parte da súa vida. Durante os longos anos de migración en terras catalás, non perdeu nunca a súa identidade galega. Isto quedou reflectido na súa produción literaria que inclúe poesía, prosa e tradución. A aportación deste intelectual lugués en relación aos galegos e as galegas na diáspora catalá  foi fundamental durante os anos da transición. Como Cronista Oficial do Centro Galego de Barcelona e como correspondente en Barcelona de diversos xornais galegos, plasmou en gran cantidade de artigos os actos culturais e sociais das e dos emigrantes galegos e colaborou decisivamente en unir a cultura galega e a catalá

• Esta é unha mostra itinerante que xa pasou por concellos das catro provincias galegas, entre os que se inclúen Paradela, Lugo, Begonte, Sarria, Portomarín, Santiago, así como en Cataluña