Do mércores 11 de outubro ao domingo 10 de decembro permanecerá exposta no Instituto Cervantes de Nova Delhi a mostra de fotografía José Suárez. Unos ojos vivos que piensan.

Horarios de visita: de martes a venres de 17:00 a 20:00 h; sábados e domingos, de 11:00 a 20:00 h.

A exposición: comisariada por Xosé Luís Suárez Canal e Manuel Sendón, exhíbense un total de 135 fotografías ordenadas en varias series, así como máis dun cento de documentos e publicacións. A mostra complétase con varias montaxes audiovisuais (en pantallas de plasma e tabletas) e unha serie de retratos de intelectuais e artistas a quen coñeceu ao longo da súa vida. Todo iso organízase cronoloxicamente seguindo as súas tres etapas vitais: a primeira, titulada Años 30, desenvólvese entre 1930 e 1936 e contén tres seccións: 'Por tierras de Salamanca', 'Galicia años 30' e 'Mariñeiros'; a segunda, Exilio; e a terceira, Retorno.

José Suárez (Allariz, 1902 – A Guarda, 1974) é unha das figuras máis interesantes e destacadas da fotografía galega e española do século XX. Nunha época na que predominaban os/as fotógrafos/as por encarga e unha visión costumista da sociedade galega, José Suárez revélase como un artista consciente da súa autoría. A súa obra reflicte unha gran preocupación humanista, incorporando novidades formais propias dos movementos de vangarda europeos como a Nova visión ou a Nova obxectividade, un intelectual admirado polos/as seus/súas coetáneos/as, un namorado de Xapón e Iberoamérica que cambiou o éxito no exilio polo esquecemento na súa terra.

Máis info: en nuevadelhi.cervantes.es, Facebook e Twitter