A Casa de Galicia presenta en Madrid a antoloxía poética ‘O Camiño das estrelas’
O poemario, co que se celebra o Ano Xacobeo, contou co apoio da Secretaría Xeral da Emigración.
O responsable do departamento autonómico, Antonio Rodríguez Miranda, prologou esta antoloxía trilingüe en galego, castelán e catalán ou valenciano.
A Casa de Galicia en Madrid acolleu a presentación do poemario O Camiño das estrelas, unha antoloxía trilingüe -castelán, galego e catalán ou valenciano- que xorde para celebrar o Ano Xacobeo e convidar a realizar o Camiño de Santiago desde calquera punto de partida.
Todos os poemas falan do que supón para a e o peregrino esta experiencia tan significativa. Cada poeta ou artista plástico tentou reflectir as súas propias vivencias dunha maneira persoal baseada na súa sensibilidade.
O proxecto foi apoiado pola Xunta de Galicia e Xacobeo 2021-2022, e o prólogo correu a cargo de Antonio Rodríguez Miranda, secretario xeral da Emigración da Xunta de Galicia, quen nos convida nel a realizar o Camiño de Santiago no que sabe que será toda unha experiencia inesquecible. O mesmo fai María Ángeles Fernández, Fundadora da Asociación de Amigos do Camiño de Santiago da Comunidade Valenciana, asociación sen ánimo de lucro que nos insta a saber máis sobre o Camiño de Levante e a que emprendamos a súa marcha desde a Comunidade Valenciana.
Respecto ás imaxes que adornan esta antoloxía, foron realizadas con esmero por diferentes deseñadoras e deseñadores gráficos, pintores e fotógrafos, de recoñecido prestixio, utilizando técnicas ás veces mixtas moi variadas e rechamantes.
O acto estivo presentado polo poeta Antonino Nieto Rodríguez; a editora Lida López Miguel; e o presidente do Centro Galego de Valencia, Manuel Fortes.
Tras a presentación, interveu o pintor Antón Lamazares e tivo lugar un recital por parte das e dos poetas Ana Mª Gómez Pavón, Gloria de Frutos, Inma Marcos, Izase Batres, Mila Villanueva, Olga Patiño Nogueira e a actriz Julia Cerdeiriña, acompañados polas voces de Tania Ruzs e Kevina Kull e polo piano de Sergio Kuhlmann.
Novas relacionadas