Obxecto

1. O obxecto das bases reguladoras é a concesión de subvencións ás entidades sinaladas no artigo 2 das mesmas para o desenvolvemento de accións de formación laboral que contribúan a incrementar á participación das persoas inmigrantes e retornadas no mundo laboral na Comunidade Autónoma galega para o ano 2012.

2. Só poderán subvencionarse as accións formativas a que se fai referencia no artigo 4 das bases.

3. Estas accións son elixibles no marco do Programa operativo FSE Galicia 2007-2013, no eixe 2 e no tema prioritario 70, e están cofinanciadas polo Fondo Social Europeo nun 80%.

Beneficiarios

1. Poderán acceder á condición de beneficiarias e solicitar as subvencións reguladas nesta resolución as entidades sen ánimo de lucro, as organizacións profesionais e as organizacións empresariais que desenvolvan actividades formativas de integración laboral dirixidas a persoas retornadas ou inmigrantes que cumpran os seguintes requisitos:

a) Estar legalmente constituídas e debidamente inscritas no correspondente rexistro administrativo.

b) Ter o seu enderezo social ou delegación na Comunidade Autónoma de Galicia,
entendendo por delegación dispor dunha oficina permanente nela.

c) Dispor de estrutura e capacidade para garantir a realización das accións obxecto de subvención.

d) Non incorrer en ningunha das circunstancias e prohibicións para obter a condición de beneficiario de subvencións enumeradas no artigo 10 da Lei 9/2007, do 13 de xuño, de subvencións de Galicia.

2. Non poderán ser beneficiarias das subvencións as entidades de dereito público, as universidades, os partidos políticos, as organizacións sindicais, nin as sociedades civís.

3. No suposto de que se presenten federacións, confederacións ou asociacións de entidades sen ánimo de lucro ou de organizacións profesionais ou empresariais, non poderán concorrer á convocatoria as entidades que formen parte destas, quedando excluídas as accións formativas que presenten as ditas entidades.

Incompatibilidade das axudas

As axudas previstas nesta resolución son incompatibles coa percepción doutras subvencións, axudas, ingresos ou recursos para a mesma acción formativa procedentes de calquera administración ou ente público ou privado, nacional, da Unión Europea ou de organismos internacionais.

Obrigas dos/as participantes nas accións formativas

Os/as participantes nas accións formativas están obrigados/as a acreditar documentalmente a súa condición de inmigrantes ou retornados/as  e a autorizar por escrito á Secretaría Xeral da Emigración para consultar os seus datos da Vida laboral, coa finalidade de comprobar o grao de inserción no mercado laboral acadado polas accións formativas  A documentación acreditando a condición de inmigrante ou retornado/a e a autorización para consultar a Vida laboral, ahegaranse á entidade subvencionada organizadora do curso ao inicio deste.

• Formularios* de solicitude (picar aquí para descargar)

*Nota: Permite cubrir os datos directamente sobre o formulario e a continuación imprimir o documento. Non se pode gardar o documento xa que se perderán todos os cambios realizados.

• Convocatoria no D.O.G. (picar aquí para descargar)
• Corrección de erros D.O.G. 12 de xullo de 2012 (picar aquí para descargar)
• Corrección de erros D.O.G. 22 de agosto de 2012 (picar aquí para descargar)
• Resolución do 1 de outubro de 2012 pola que se modifica a Resolución do 25 de xuño de 2012 (picar aquí para descargar)