O secretario xeral de Emigración, Santiago Camba, xuntouse coa nova directiva do Centro Galicia de Buenos Aires, para ultimar, entre outros asuntos, o traslado da Delegación da Xunta na capital, que se fará efectiva no mes de setembro.

A sociedade recreativa, referencia para a comunidade galega na Arxentina, asumirá nas súas amplas instalacións- 14.500 m2- a oficina do goberno autonómico, de cara a reducir o seu custe operativo e mellorar a atención directa aos galegos do exterior, destinando parte dos aforros a proxectos sociais que os beneficien.

O compromiso fora asumido xa en Consello da Xunta, seguindo o plan de austeridade que defende o goberno autonómico. Con elo, búscanse evitar gastos innecesarios e fomentar políticas de aforro, que en ningún caso afecten o sostemento dos gastos sociais nin o correcto funcionamento da sanidade pública.

Así mesmo, no transcurso da xuntanza, esbozáronse novas liñas de colaboración no área recreativo, educativo e cultural, que defende a entidade, y especialmente destinadas á mocidade. Neste punto, subraiase a creación dunha escola de hostalaría que poña en valor o peso importante da influencia da restauración galega na Arxentina e que cree novas opcións de futuro para aos descendentes da comunidade galega.

Amplas instalacións
O Centro ten en propiedade 14.500 m2 nos que se integran, ademais do propio local social de Bartolomé Mitre, as instalacións do Colexio Santiago Apóstol, un campo de deportes e a finca de recreo Campo Galicia, na privilexiada zona da localidade de Los Olivos, nas aforas de Buenos Aires.

30º aniversario
O Centro Galicia de Buenos Aires nace en 1979, froito dos xa existentes centros coruñés, ourensán, lucense e pontevedrés coa finalidade prioritaria do irmanamento de todos os galegos e a exaltación dos valores propios e dunha identidade de orixe, desde a perspectiva recreativa, social e cultural. Así, no seu Estatuto Social recóllese entre os obxectivos e alcance da Institución a defensa da idiosincrasia galega; a aprendizaxe dos costumes e historia de Galicia e o fomento do espíritu da solidaridade e o traballo comunitario.

Referente para a comunidade galega
O grande número de socios- máis de 10.000- expresa a súa forza social na Arxentina, e fai deste un lugar de referencia da nosa diáspora en Buenos Aires. O seu peso vén avalado ademais por ter inscritas nas súas instalacións o Centro de Saúde e Deportes, en marcha desde 2004, a Oficina de Información xuvenil e a Oficina de información para o retorno, así como un Aula permanente de formación e cultura de Galicia, que desenvolve ata o presente un proxecto integral de extensión cultural e de formación que permite aos estudiantes da colectividade galega o achegamento ás súas orixes.