Bos Aires Celebra Galicia 2017
Dentro do proxecto que leva a cabo o Goberno da Cidade de Bos Aires dende o ano 2009 co obxectivo de homenaxear a todas as colectividades emigrantes asentadas en Bos Aires, a nosa terra será -por cuarto ano consecutivo- protagonista na Capital Federal arxentina, mostrando a nosa cultura, costumes e identidade no "Bos Aires Celebra Galicia", que na presente edición leva a epígrafe 'Polos recunchos galegos'.
Nesta cita da primavera austral de 2017 tamén estará presente o stand do Galicia Pórtico Universal -o programa da Secretaría Xeral da Emigración da Xunta de Galicia que está a achegar a nosa terra a diversas cidades de España e do mundo- e as cidadás e os cidadáns de Bos Aires que se acheguen á Avenida de Mayo poderán coñecer máis sobre a nosa artesanía, gastronomía e oferta turística, e na que como cada ano serán protagonistas desta celebración as entidades galegas (chegadas de toda a Arxentina e países veciños), e cos galegos e as galegas da nosa colectividade como embaixadores e embaixadoras da Calidade de Galicia.