A poboación residente en Galicia a 1 de xullo de 2022 situouse en 2.691.456 habitantes, cun saldo migratorio exterior positivo de 12.106 persoas e de 622 polas procedentes de outras comunidades autónomas, segundo recolle a Estatística de Migracións que acaba de publicar de xeito provisional o Instituto Nacional de Estatística.

Durante estes primeiros 6 meses, o saldo migratorio positivo conseguiu reverter o saldo vexetativo negativo, gañando poboación en 1.995 persoas.

Deste xeito, segundo publica o INE, continúa producíndose, ao igual que en anos anteriores, un aumento de persoas que chegan a Galicia, xa que nos seis primeiros meses do 2022 entraron na nosa comunidade autónoma practicamente o mesmo número de persoas que en todo o 2021, un dato que vén destacar que o 2022 será un ano cun importante aumento do número de ingresos.

O avance da Estatística de Migracións do ano 2022 revela que Galicia, ao rexistrar un saldo migratorio positivo co exterior de 12.106 persoas, sitúase como a sexta Comunidade Autónoma con maior pulo de atracción. En relación ao movemento entre comunidades autónomas, atópase no quinto posto en atracción de poboación, cun saldo positivo de 622 persoas.