Miranda participa nas xornadas da Escuela de Verano del Poder Judicial trasladando a experiencia da Secretaría Xeral da Emigración no eido da transformación da Galicia exterior nas últimas décadas
O responsable deste departamento autonómico salientou o traballo de modernización e dinamismo levado a cabo tanto pola Administración autonómica como polos diferentes centros galegos.
O secretario xeral da Emigración, Antonio Rodríguez Miranda, participou hoxe nas xornadas da Escuela de Verano del Poder Judicial no Pazo de Mariñán (Bergondo) no que trasladou a experiencia deste departamento autonómico no ámbito da transformación da Galicia exterior nas últimas décadas.
Rodríguez Miranda salientou o traballo do Goberno da Xunta para ofrecer unha asistencia sociosanitaria digna aos galegos e galegas do exterior; así como o esforzo para incentivar o retorno a través da Estratexia Galicia Retorna xa que “supón un importante impulso para a nosa demografía e porque tamén permite mellorar a nosa competitividade económica e social”, explicou Miranda.
Do mesmo xeito, o secretario xeral tamén destacou o papel das entidades galegas do exterior, creadas grazas á solidariedade e necesidade de cooperación das e dos galegos emigrados, e que facilitan tanto actividades culturais e deportivas ás e aos máis mozos, como atención socio sanitaria ás galegas e galegos máis desfavorecidos que necesitan un apoio especial. “Coidar dos nosos cidadáns, estean onde estean é unha responsabilidade ineludible de todo goberno”, expuxo Miranda.
Miranda matizou que a Administración autonómica está esforzándose para “que o XXI se consolide como o século do retorno”, afrontando unha segunda revolución social que permitirá a Galicia poñerse na vangarda para afrontar con éxito a globalización grazas á modernización que aporta a experiencia de moitas e moitos destes retornados.
Novas relacionadas