A Secretaria Xeral da Emigración destina, a través dun acordo de colaboración, 30.000 euros para o Hogar Gallego para Ancianos de Domselaar de cara a axudar na atención socioasistencial básica aos galegos e galegas residentes na capital da Arxentina.

Esta entidade sen ánimo de lucro ten como finalidade proporcionar albergue digno a persoas que estean a pasar situacións complicadas a causa da súa idade ou condición económica. Trátase dunha residencia de maiores, situada en Domselaar, con capacidade para máis de cen residentes, na que máis da metade son persoas procedentes de Galicia. A residencia bríndalles vivenda permanente e asistencia integral que inclúe a estancia, a alimentación, o control de saúde e asistencia social.

A Secretaría Xeral da Emigración estima que é necesario colaborar para contribuír á prestación de asistencia á colectividade galega residente na Arxentina que, por razóns de carencia ou dependencia, se atope en situación de necesidade e non poida afrontar o custo da súa estancia.