Emigración lembra que a convocatoria de axudas para o programa de obradoiros nas entidades galegas do exterior remata este venres
O programa, que pon en marcha talleres de folclore, artesanía, cociña e seminarios de cultura galega, conta cun orzamento de 150.000 euros e sufragará os gastos de contratación do profesorado e materiais de formación.
Os obradoiros poderán ser impartidos pola modalidade presencial ou telemática.
A Secretaría Xeral da Emigración lembra que a convocatoria de axudas para a posta en marcha de obradoiros de folclore, artesanía, cociña e seminarios de cultura galega nas entidades galegas do exterior remata este venres, 1 de xullo.
O departamento autonómico dirixido por Antonio Rodríguez Miranda, volve ofrecer axudas para a posta en marcha de obradoiros nas entidades galegas do exterior, cun orzamento global de 150.000 euros para a posta en marcha destas actividades, sufragando así a administración da contratación, desprazamento e aloxamento do profesorado, así como a compra dos materiais de formación. Pola súa parte, as entidades encargaranse das instalacións onde se impartan os cursos.
Mantense, como o ano pasado, a modalidade presencial destes obradoiros e a modalidade telemática a través da aula virtual, unha plataforma onde a persoa formadora e o alumnado interactúan, de xeito concorrente e en tempo real, a través dun sistema de comunicación telemática. En ambos casos, os cursos serán impartidos por profesionais con recoñecida experiencia nas distintas modalidades.
Os centros poderán solicitar, por orde de preferencia, a organización de ata 3 cursos, e propor unha ou un profesor para que o imparta, sempre que estea incluído nas listas de persoas formadoras na modalidade solicitada. Para a realización de obradoiros de cociña ou seminarios de cultura galega, as entidades deben contar con instalacións e equipamentos axeitados, e ter entre os seus obxectivos a promoción e difusión dos costumes e a cultura de Galicia.
Novas relacionadas