Emigración coñece “Kalewa”, o proxecto empresarial apoiado pola Xunta dunha galega retornada que deseñou este aparato de pilates único en Europa
O secretario xeral da Emigración, Antonio Rodríguez Miranda, destacou que continúa aberto o novo programa de axudas para emprendedoras e emprendedores retornados cun orzamento de 800.000 euros.
Nestes dous meses xa se presentaron 120 solicitudes nas dúas liñas coas que conta este ano, unha para a promoción do autoemprego e outra destinada a compensar as perdas provocadas pola redución da actividade económica das persoas traballadoras autónomas a causa da pandemia.
O secretario xeral da Emigración, Antonio Rodríguez Miranda, coñeceu hoxe, na explanada da Cidade da Cultura, o proxecto dunha emprendedora retornada da Arxentina que puxo en marcha en 2020 unha iniciativa de deseño e comercialización en liña dun aparato único en Europa para realizar actividades orientais a través da liña de axudas ao emprendemento deste departamento autonómico.
Karina Alejandra Lomba e a súa filla, Lara Castro Lomba, retornaron da Arxentina á terra natal dos avós da primeira, que eran oriundos de Lugo. Decidiron asentarse en Ames e dende alí poñer en marcha un proxecto relacionado coa súa especialidade, a práctica deportiva. Así naceu “Kalewa”, un aparato destinado á práctica deportiva de actividades coma o ioga, o pilates ou o tai chi. Para a posta en marcha deste negocio contou o ano pasado cunha axuda da Secretaría Xeral da Emigración de 8.000 euros, a través da liña de axudas a emprendedoras e emprendedores retornados.
O secretario xeral da Emigración destacou a importancia do pulo empresarial das e dos galegos retornados, “que apostan por poñer en marcha novas empresas, moitos deles no rural, e xerando postos de traballo”.
Neste senso, Rodríguez Miranda aproveitou o encontro para recordar que continúa aberto o novo programa de axudas que conta en 2021 cun orzamento de 800.000 euros. O pasado ano, beneficiáronse da mesma 94 emprendedoras e emprendedores retornados. “Nos dous meses que levamos coa nova subvención aberta xa contamos con 120 solicitudes das dúas liñas coas que conta o programa este ano, unha cifra que demostra o interese polo emprendemento de aqueles que desexan volver a Galicia”, engadiu o secretario xeral.
E é que este programa de axudas ao emprendemento dos retornados e retornadas conta este ano cunha liña especial a causa da covid-19, “xa que somos conscientes das dificultades que supón emprender e máis nun tempo tan complexo como o que estamos a vivir coa actual pandemia”.
Deste xeito, o programa conta con dúas liñas de axuda para persoas emigrantes galegas retornadas que exerzan a súa actividade laboral ou profesional na nosa comunidade autónoma, unha que promove o autoemprego co obxectivo de fomentar o establecemento como persoas autónomas ou por conta propia, e outra, relativa á covid-19, destinada a compensar as perdas provocadas pola redución da actividade económica das persoas traballadoras autónomas ou por conta propia no contexto actual de pandemia. O prazo de presentación remata o 30 de setembro.
As axudas son de 5.000 euros no caso da primeira liña (aumentables en 1.000 se a beneficiaria é muller e outros 2.000 se se pon en marcha nun concello rural) e de 3.000 no caso da segunda liña.
Esta liña de subvencións ten como fin favorecer o retorno á nosa comunidade autónoma das e dos galegos residentes no exterior de xeito que poidan fixar a súa residencia e integrarse social e laboralmente na sociedade, realizando nela as súas actividades empresariais e profesionais, favorecendo así o desenvolvemento do tecido empresarial de Galicia.
Trátase dunha das máis de 50 medidas incluídas na Estratexia Galicia Retorna, de carácter transversal e coordinada pola Secretaría Xeral da Emigración coa colaboración de todos os departamentos da Xunta de Galicia.
Novas relacionadas